قسم الله ودعوض4

صلاة الله على من واجبالو ..

سلامي يفوق على الحصى والرمالو ..

*~*~*~*~*

رفعت يدي يا مولاي يسر

على قلبي المديح اروي وافسر

رواة القبلي منهم لا اقصر

انت ذو الملك عزو وجلالو

*~*~*~*~*

ثنيت بي الما خلق اعظم عليهو

وين في الرسل يقربلو و شبيهو

دا يوسف كان جميل هو فاق عليهو

مربعة قامتو، حاجبو كذا الهلالو..

*~*~*~*~*

حملت بت وهب بي من خيارا

دا ادم جاها وادها البشارة

نبوة ، الكانوا سامعين الخبارا

يهنوا بي التبعو ورضالو

*~*~*~*~*

يوم وضعوهو حضرن في مكانا

ام عثمان وام عبد الرحمنا

يقولن انبق نور نبي الزمانا

كنعان واليمن لي الروم ضوالو

*~*~*~*~*

جاتو سعيدة الدارين حليمة

ما دارتلو اجرة ولا عزيمة

تقول جيد لي بي اب نية سليمة

شياها القارضة صارن حالبه لو

*~*~*~*~*
مرق في الحر تبراهو السحابه

جلس في الحضرة يحكي لينا الصوابا

مريض ننجاهو بي مساهو طابا

قديم الجذع شال بلح انتكالو

*~*~*~*~*

تقولو الصيدة يا سيد النبوة

يهودي سجني ما لي معاهو قوة

تاركا لي طفال عاوزة المروة

محسنة ظني فيك يا سيد بلالو ..

*~*~*~*~*
خلصني اروح ارضع جنايا

يهودي سعيد وسابقالو العنايه

الحكم من الله والمخلوق بدايه

خلصها من سواجير الحبالو

*~*~*~*~*

قعد احمد ضمين راحت عيالا

تقول لي اصغر الجيديان تعالا

ارضع بي عجل ما في بالا

ضمني انا القبلي الجمل اشتكالو

*~*~*~*~*
الجدي قال ليها لبنك ما بدورو

شكيتي عليهو ليه يمة النبورو

دا مدخور القسا يوم النشورو

ليه تضمني ليهو من عاداهو وجفاهو

*~*~*~*~*
اتت في حينها لي حل الضمانة

اليهودي بكى وقال لُو علي امانة

الاله القربك حاضر معانا

انت جيت من الله حق عبدو ورسولو

*~*~*~*~*
اصحاب الرسول حقو الفراسة

بحور العلم للدين والدراسة

ما دخلوا البنادر للكواسة

بيقدلوا فوق رسولهم ما بي يبالوا ..

*~*~*~*~*
البريق لاح لي من جيهة شروقو

شغل لي بالو من للحب عشوقو

لبيب حِلولو قيدي نوى المروقو

مفوض امرو للفاق في كمالو

*~*~*~*~*
يقولك ود عوض يا سيد عكاشة

يا اب حوضاً سبيل يروي العطاشه

بخاف يوماً الممات يوم الفتاشا

بدور تحضرني عند ساعة السؤالو

*~*~*~*~*
صلي الله ربي ثم سلم

بي عدد الكتاب حلل وحرم

عدد وصف الجزولي والله يعلم

هديتها لي رسولنا الواجبالو

اهداء لكل اعضاء المنتدى الكرام وكمان لكل الاهل بالعكد العزيزة