حيدر الشيخ «مافي داعي»

مافي داعي ..

لما ألقاك بتهرب مني أوجاعي ..

صدقيني

في غيابت جُب .. بعيدة ..

ماخده معاها كل آلامي وصداعي

شايله احزاني وأفضل أكتب

فيك مليون مليون قصيدة ..

بي دم قلبي ..


ما دا أصلاً ليك حبري ويراعي


وتفرهد الدنيا زاهية بيهو حُب ..

مشاعرك ليهو تروي

وفينا إصُب

والقواسم والطلاسم

فيهو تبدو غير..


الفرحة شلال طاير

إغرد بيها طير

ممزوجة بي صمتك وإلتياعي



والحكاية هنا تبدو عاطفة عاصفة

وجد جديده

عصافير تتناجى والأعشاش بعيدة

والأثير صبابة جابه أشواق وريدة

بداعي الحب وغيرو أصلاً في داعي



أسأليني .. لو شئتِ..

أو أعذريني وقولي إنتِ ..

كلميني عن ..

الغِبطة الجاية ندية صوتك

وردة وحارسك فراشة وين أفوتك



وعن سر الجاية طالعة

حَرى مَرة ومُرة .. آها

والدنيا الماخدة من عيونك

لونه وصفاها

وعن مشاعر عطشانة

وعشمانة تلقى عندك رَواها



وعنك ..

وعن كيف كان أول إنطباعي

أحكي .. ولا ما في داعي



لو تدري إنك .. أول مرة شفتك ..

أو بي الأحرى شفتَ جمال حروفك

كانت أول مرة أشوفن

وفيهن أشوفك



مُهرة .. جامحة جاية جاريه

قلبي مضمار عامله ضربة بدايه

وفي أخرى روايه

عامله أشواط لي النهايه



النظرات المتعة القراية

ساربة سايرة قصة وحكايه

يا للجمال الروعة آيه



أحكي لسه ولا .. ما في داعي

أحكي ..

ضاحكة وجمالك .. يا الله .. إبَكي



شايله حِسِك .. من مَدَسِك

مغاراتك كهوفك

دافقه فيّ صوتك

وهامسة عليّ خوفك



وليّ وصية قايلة ..

بالله .. من نفسَك خلي بالَك

ما تسرح وشوية ألجم خيالك

وإن نسيت سؤالك



أعذرني

ما حالي أصبح زيو حالك

خايفاهو مني بعيد

جاك شالك



بعدين بجيك أجاوب سؤالك ..

هو شنو كان سؤالك؟!!!

نسيتو ما حالي مش قلت ليك

بقى زيو حالك



كانت كلماتك لي وصيتك

في كل مرة فيها لينا جيتك

ربنا إديك على قدر نيتك

ومن نفسِك برضك خلي بالك



في زمن الأنفاس فيهو لاهثه ..

وهو إقسى

لي وين .. ومتين بينا إرسى ..

أنا ما عارف ما إنتِ أدرَى



إلا ريدك حقيقة بيهو بتَّ أدري

يا ريت لو عرفتك من زمن بدري

كان حاجة تانية أصبح بيك عمري



دي لحظة كانت حاجة تانية خالص ..

بقيت في حالة تانية .. وصدقيني

لو قلت أني في حكم الواعي

لكني بقيت ماني واعي



ولو تدري القلب سوا فيّ العجب

مساهر الليالي وإمكن عارفة السبب

ما الفراق قسوة وفي حكم الصعب

زايد وواقد جوانا لهب



يا قمري الطلوع ما أحتجب

ما الليالي .. لي الزيو حالي

جد طويلة

معقولة بعد دا كلو ..

لسه عايزه تعرفي عنك إنطباعي