وفاء قاسم « حواف القيف »

حواف القيف
**********

حواف القيف

بجيلك من حواف القيف
لحظة نيل فتح ضفة

اخاف تجرفني احلامي
تتاكي الريدة زي ضلفة

تنادي عليك اشواقي
وتلهب نارا بي لهفة

يجيك حناني في تيار
بيحضن ريد هواك إلفة

تلاطم موجتي فوق الموج
غامرة شعوري ملتفة

آه يا ليل وليل الاه
قلبي رميتو في منفى

زفيرك شهقة انفاسي
نسيمك باقي لي وصفة

بريد لحظة غروبي معاك
تزيدو ودادي غير كلفة

اريتو سكوني بس جواك
حنينك يجيني بي عِرفة

اريت يا نيل تزين عمري
تخلي الريدة في كفة

اصلي براي بقاوم فيك
حكايتي معاك مختلفة

فريت فوقي توب مويتك
شلتو غطا وكمان عِفة