إقبال سليمان عكود «صوت الوطن»

صوت الوطن
**********



جميل صوتك جميل
لآمن نده ليا
معتق بالمحبة
وكلو حنية
وقال أرجع تعال
ياغالى عود ليا
زمان راجيك أنا
مفتوحة أيديا
بالدفأ والآمان
مليانة جنبيا
أحميك وأختك
جوة عينيا
***
فرقت السنين
بينك وما بيا
محتاج ليك أنا
ولازم تعود ليا
خلى الغربة تبقى
سنينا مطوية
أيام وأنتهت
رجع ألأمل ليا
فى وجودك تكون
الآهة منسية
يازين الخصال
الما غدر بيا
***
وحاتك يا بلد
جايك مهما كان
تعيس فى دنيتو
الفارق الأوطان
جافاهو السعد
إتوسد الأحزان
بعيد عنك شقيت
يا سيدى يا سودان
طعم الغربة قاسي
يسمم الأبدان
ومشتاق لى لقاك
ولى لقاء الحبان
والنيل العظيم
الجارى والكثبان
وللناس العزاز
البكرموا الضيفان
والخضرة الجميلة
اليانعة فى الوديان
***
جاييك يابلد
أشواقى بالاطنان
ومكتول بى هواك
وكلي شوق وحنان
القاك وأشوفك
يا عظيم الشان
وإن قصرت فيك
سامح عشوق ولهان
لمتين أوصلك
أنا سآئل الرحمن
وحالف ما أفارقك
تانى مهما كان
أديتك وعد يا درة البلدان
وأديتك وعد يا زهرة البلدان