إقبال سليمان عكود «أنا ما بودع مرتين»

أنا مابودع مرتين
************


ودعت دربك من زمان
وأنا ما بودع مرتين
ودعتو لما قسيت علي
صابني الأنين
سافرت فارقت الوطن
ونسيت هوى قلبي الحنين
عشعش غراب البين سكن
بيناتنا بي نغمو الحزين
ونسيت هواي وفضلت
تايه ليك سنين
ضليت و دربك ماعرفتو
يودى وين ؟؟
وأنا مابودع مرتين
ودعتو يوم أصبحت
بالريد تستهينِ
يوم أنقطع حبل المودة
الكان متين
يوم صرت بى عطفك ضنين
ودعتو يوم حسيت
معاك ما باقى
غير حسرة وأنين !!
ودعتو لما لقيت عينيك
مافيها رأفة ولاحنين
يوم أنفقد فيك الصديق
الكان وفى
والكان أمين
يوم ما بقيت لى الرفيق
تعطف على
الأقدار تعين
ودعتو يوم كان فى
حياتى بجد حزين
ودعتو دربك
من سنين
أنا مابودع مرتين