تويت
إقبال سليمان عكود «ليك يا وطن»
ليك ياوطن
********
ليك ياوطن
ليك يا وطن مليون تحية
وألف طن باقات سلام
وقفات معزة وإحترام
ومحب عفيف لي رفعتك
يهتف دوام..
ليك يا وطن أحلى الغناء
وأحلى الكلام..
و ليك من بعيد أنات غريب
في الغربة زاد يبهو الهيام
ليك يا وطن من غربتو وعبر
المسافات الطوال
مليون سلام...
يا عزوتو يا مهد أجدادو الكرام
كلمات وفاء وكلمات غرام
ومحبة زايدة على الدوام
من غربتو ليك يابلد
مليون سلام..
حكمت ظروفو يروح بعيد
في غربتو ما هو الملام
ما كان بعادو هناك مرام ..
كم شاف هموماً في الدروب
ودع خريفو بلا غمام
وشتاهو مرا مروركرام
وكل الفصول عدت بلا روعة ونظام
أيام وتمضي بلا نعيم يا حليلو
طعم الابتسام ..
يا حليل أماسينا القبيل
يا حليلو منظوم الكلام
يا حليلها دنيانا الهناك
منسجمة أخر انسجام
وآه من بعادك يا وطن
خلينا فيك أجمل غرام
وطعم البعاد آه يا بلد
في القلب زى طعن الحسام
وليك يا وطن لازم نعود
نحن ابتعدنا بلا جفا
ولازم نعود في قلوبنا شالين ليك وفاء
ولازم نعود لي راحةالبال والدفا
ولازم نعود وأشواقنا لازم تعرفا
فيك يا وطن دنياناساهلة ومترفة
وليك يا وطن مليون تحية
وألف طن باقات سلام
وقفات معزة احترام
***
وطني العظيم وطن
النعيم وطن الجمال
العيشة في حضنك
يمين معتدلةأخر اعتدال
وطني الجميل وطني الكبير
من الجنوب حتى الشرق
ومن الغرب حتى الشمال ..
مليان خضار مليان تلال
حراسو من أعتى الرجال
شاربين مياه النيل زلال
ماكلين حلال والبسمة في
بلدي الوفي مقرونة بي
طعم النضال
والدمعة في وطني العزيز
والله بتهد الجبال
والفرحة في بلدي الحبيب
مزيونة ذي الكرنفال
والله يا بلد الأمان
لولاك ما كان الكمال
والطيبة زادت روعتك هيبة وجلال
والعيشة في بعدك عذاب
يا غالي فوق كل إحتمال
الفارقك وآ حسرتو
ميز انو دائما في اختلال
ويا سيدنا حبك في القلوب
كم صال وجال
حب الموله للوصال
وريد الغروب للارتحال
وشوق البخيل يجمعلو مال
وحب اللي بيعرف محال
حب ما هو موجود في الأرض
حب في الخيال !!
