سعادة عبدالرحمن « تنين ان ختنك في المحن ماتبالي »

تنين ان ختنك في المحن ماتبالي
***********************

تنين ان ختنك في المحن ماتبالي
رفق الدون واطماع النفس في المال
ترديك في الهوان وان كان مقامك عالي
والاتنين خصم من صالح الاعمال

واتنين لا تصغر نفسك اتحاشاها
سيرة الناس وان كان الخشوم لايكاها
الموقدلو نار يوم بكره بتوطاها
والجابلك خبار الناس اكيد وداها

والجرح المنوسر ما بتطبو الكيه
وماببرد حشى المحروقه قولة احيه
الا القول بطيب خاطر المأذيه
باعك واشتراك زولا غفرلك سيئه

والتجى من بعيد قسمتنا نتلقاها
حار الشينه من الليك كان سواها
لابتقدر تصل حدا تلزمو ياها
ولا بداوي الزمن جرحك ولا بتنساها

والماساتروا الله كضبته ما بسترو
الزول ان ختيت فيهو المروه اخترو
الضفر ان نقح صح البدن في بترو
دربك اعوج ان قبلك كبارك عترو

واحذر وش منافق ببشاشه يقلدك
وحين تديو قفاك بسياط لسانو يجلدك
ماتأمن عدوك ما حك ضفرك جلدك
نسبك للوراك صحيح ابوك الولدك

والليك ان عدوك بتختو في ود عينك
الناس ما تياب كيفنها اصابعينك
مهما انت بازل ما بتسدد دينك
ترجع لمراحا العرجا والله يعينك

وزول ان ملكتو امرك كان غلط ما تلومو
وماتعشم صغير بيك يكبر كوموا
الزول الصميم بحكمه داوى همومو
ما تستنى لقسم البقوم من نومو