تويت
كنت فاكرك عني تسأل
مره لو طال الغياب
قلبي يفرح بي سؤالك
وبيهو يتخطى الصعاب
وشوقي لي لحظة سؤالك
بيها أسعد بالغياب
شلت حبك في عيوني
وشوقي زايد في التهاب
قلبي ينبض بي غرامك
وربي يعلم ليك حاب
والعهود الكان في جنبك
كنا أقرب من قراب
كنت أسقيك المحبة
جوة في الاحساس شراب
وفيك أسرح في عيونك
وارتقي فوق السحاب
قلبي مخلص في المحبة
وفيني روحك كان مذاب
وأصلو ما كانت ببالي
انو يوم تصبح سراب
غيبة عنك ما بايدي
وليس كانت في الحساب
ولو ألومك شان بحبك
حتى لو قاسي العتاب
كنت راجيك يا حبيبي
مرة تطرق لي باب
عني تسأل وين حبيبك
وينو طول لينا ساب
واعرف إنك ما نسيتني
الا ظني الفيك خاب
خاطري سايل من جفاك
وقلبي شايل في ارتياب
ليه جفيت قلبي البحبك
ونفسي أعرف للجواب