تويت
حيدر الشيخ «عيونه الفصاحة»
عيونه الفصاحة
البِنَيْه الماده دي التبروقه
سمحه وزينه وفيها الروقه
النظره المن العين مسروقه
الدنيا الحالك ليلها ولاصفه بروقه
البِنَيْه الرايده داريه وحايره
ومن الخلوق معشوقه
زي الشمس من بين الغمام
بازغه شروقه
الحمامه الماليه الدنيا هديل
ولافت طوقه
الرويحه التشابي عليها شوق
وبي حبل الوداد محذوقه
زي توايم إيران قدرة خالق
قدير قدر ليها لصوقه
كاتلني اللطيف وملون وضاحك
مفرهد عجيب كيف ذوقه
سايس الدنيا إن عز وصعب
قِياده وسوقه
المكتوبه مهما طال مداها
لابد ليها يوم ملحوقه
النصيب لازم يصيب بس بشوفه
إبلاً في عز النهار مسروقه
الدروب الوِعُوره صعب مشيها
وحشه وقَبُل ما مطروقـه
سمح مشيها ان ولفت عليها أو
مجبور زواملك خليت وراك محروقه
عجيبه الدنيا وأعجب من عجبها
عجيبه حاله وراحله فيها خلوقه
وعجيبه الناطقه جميعه والمثال
عيونه الفصاحه كيف منطوقه
