ميرغني النقي «بعد الرحيل»

بعد الرحيل أصبح وحيد لا لي أهل لا لي صحاب
موحوش فؤاد، مدمن سهاد، والنوم يفر زي السراب
*******
شوفو الحصل وكتين رحل روح بعيد من عيني غاب
رحل الحبور والهم حضور والحزن يطرق كل باب
*******
نجمي المطل ساعة أفل حسيت شعر للحزن ناب
الفكر طار والعقل حار والقلب اضطرب اضطراب
*******
آه يا زمان ما ليك أمان من خت فيك آمالو خاب
أحلف يمين قول لي لمين في الغابرين حقق رغاب
*******
تغدر تخون ما ليك زبون ما شفنا طبعك في الذئاب
كم أنبوك كم عاتبوك لو كان بينفع فيك عتاب
*******
وادينا من بعد الخضار بعد النضار أصبح يباب
وبعد الغيوم لافح سموم صالينا بي نيرانو آب
*******
وسمانا داك الكان هناك راوينا من موية السحاب
ثاير عصار جالب غبار والجو ملبد بالتراب
*******
ونغمي الحنين أصبح حزين يبكيني في وتر الرباب
فتق جروح خلاني انوح والدمع ينسكب انسكاب
*******
عبد الحميد جيب بيت قصيد عزيني يا خوي في المصاب
أصلو الظروف صارت سيوف يا خوي مسلطة في الرقاب