ميرغني النقي «رسالة للشاعر سيد أحمد عبدالحميد»

يا سيد أحمد بيك ما بي
حالي حالك وحالك علي
ياها قسمة ريدنا يا خي
لا بأيدك لا بأيدي
*****
في هواي شيدت قلبي
دير وفيهو عبدت ربي
قلت في الفردوس نصيبي
وشوف زماني ورحمتو البي
*****
لما شافني سعيد وهاني
في ظلال صرح الأماني
شال معاول هدمو جاني
وفي حطام صرحي دفني حي
*****
قالوا أخو الأسى يومو أعوام
وفي خيوط الأسى والظلام
يا سيد أحمد تحت الحطام
لي ستة سنين مطوي طي
*****
لا شرق في كوني الصباح
لا أنار ظلماتي مصباح
في دجاي همومي أشباح
ومابتطيق رؤياها عيني
*****
ياهو حال الدنيا الخراب
إلا بس يا خوي النصاب
تحلو فيها أيام الشباب
وين حلاتو شبابنا قول لي
*****
من بعد شيعنا المراد
وفي شبابنا لبسنا السواد
الزمن يا خوي كان جاد
مابيزيل الخلفو الكي
*****
غني لي يا الشادي الحزين
في غناك لي جرحي تسكين
قول لي درب الرجعة بي وين
يا الضهبت معاي في الصي
*****
كان يفيد البكا كم بكيت
ولي تراب الأرض اشتكيت
كان تفيد يا ريتني يا ريت
لا وُجِد لا كنت يوم شيء
*****
الدموع قالولي كالراح
وقالو دمع العاشق مباح
قلت أبكي لعلي أرتاح
شوف عذولي شماتو كيف في
*****
كان أراح البي العذول
كنت بحمد ربي وأقول
في تعاستي سعادة لي زول
وزيدني يا مولاي في البي
*****
إلا ما ظنيت يسترح
كان يضري رمادي للريح
مابتخلي الأفعى الفحيح
وبي كلامو ومنطقو العي
*****
جاني لابس توب النصيح
يبكي يندب قدري الشحيح
الدموع دمع التماسيح
وفوق لهيب ناري شواني شي
*****
يا عذول ما فاد الصليح
وماني أبكم وماك المسيح
في الغرام مجروح والجريح
مابيداوي جراحو الحدي
*****
يا سفينتي الطارت ألواح
وا مصيبتي الماني سباح
كيف مصير الغاثو تمساح
اللبلعو الحوت كان نبي
*****
كيف تغازل قلبو أفراح
ويغدو فوق أغصانو صداح
الكسيح مقصوص الجناح
والزمن قصاها جنحي
*****
كان بطير الريشو منتوف
ياهو دا إبراهيم ابنعوف
لسه في أحزانو مكتوف
فوق لهيب الماضي القصي
*****
وكان حيت راجيني مشوار
في طريق التيه والودار
المصير قدامي كالنار
إلا ناراً ما ليها ضي
*****
يا سيد أحمد طال الكلام
داير أقول لك عند الختام
بلغ المعشوق السلام
وانعي للعشاق النقي