ميرغني النقي «كان بايحي يوم لاقيتا»

كان يا يحيى يوم لا قيتا = دنقر في التراب عاين
صد عينيك من عينيها = خايفك بيها زيي تجن
******
لا تقول ليّ أيه الفيها = كل العارفو عقلي محن
ولا ترجاني أوصفا ليك = كان بي ودي داك لكن
ما بقدر علي تصويرا = مهما كت لبيب وفطن
صورتا في الوجود معدومة = وفي صور الخيال ما أظن
******
البقدر أقولو أنا ليك = هواها في قلبي متمكن
وغاير زي سهم في ضلوعي = يطعن في فؤادي طعن
أما مصيبتي ود عينيها = في تعذيبي متفنن
لا سايبني أمشي أفوت = لا خاليني فيه اسكن
******
بكيت شكيت اتشفعت = لقيتو لا يغني لا يسمن
وكيف الشورة راجيك يحيى = بي رايك علي تمن
لا تقول ليّ سيبا أنساها = كوني أنساها لا يمكن
كيف أنساها والشوق ليها = ناقوس في فؤادي يرن
******
عايش فيها بي أفكاري = مسجون بي خيالي سجن
كل ما أقول أسيبا أنساها = ألقا فؤادي ليها يحن
أما نصيحتي كان لاقيتا = كون يا خوي متحصن
لا تحاول تعاين فيها = تراك شفت العلي كيفن