تويت
العمده طه(1)
تَعَالْ يَا الفَنْجَرِى بَى سِيرَتُوهَا النَتْحَاجَا
الوَلَدْ الفِى لَيالِى الحُوجَه بَقْضِى الحَاجَه
ضَبَّاحْ اللَّبَح عِنْدُه الدَّعُولْ مُشْ حَاجَه
طِوَالْ إيْدَيه للنَّاس الزَّمَانَه أحَاجهَ
هُو طَه كَانْ أحْيَا كَرَمْ البَرَامِكَه مَالُو
دَا فِى الكَبَّاشِى بِيتْ أخْوَالُه بِيتْ آمَالُو
طَه جَزَمْتَ قَاسْيَة عَلى العُمْدَ أعْمَالُو
ونَاس ضِيُوفْ عُزَّازَ جَارُه بَذَّالْ مَالُو
العُمْدَ عُمَّرُوا الزَّايلَه أمْ عَمَّاراً خَرْبَه
وإتْ عَمَّرْت أُخْرَاكِ بِى بَشَاشَه وطَرْبَه
فِى السُّوفَات بِيُوتَك بالضِّيُوف مِنْزَرْبَه
والعُمْدَه أبْ عِشَيَّاً دَابُو تَاكْلُو الحَرْبَه
وَاحْدِينْ لِذَّتُنْ فِي الدُّنْيَا كَنَزْ المَالْ
ولِذَّة طَه صَرْفُو وفَرْحَة الأُمَّالْ
الوَاعِى الحَنِينْ المُشْفِقْ الجَّامَالْ
بِقَى لَيهُ التَّوَكُّلْ واليَقِينْ رَأسْ مَالْ
يَرَى فِى نَفْسَه تَقْصِيرْ مَهْمَا بَلَغْ لُه كَمَالْ
يَنْسَى حَسَنْتُو فِي السَّاعَة وتَزِيدُو جَمَالْ
مُوَفَّقْ مِنْ نَشَأ لَى صَالِحْ الأعْمَالْ
سَمْحَة قَدِلْتُو والضَّيْفَانْ يَمِينْ وشِمَالْ
-----------------------------------------------------
كان محمد ود خالد من أبناء الدبيبة يحفظ شعر ود الرضى ويحفظ أيضا لشعراء البطانه.
كان يحكى عن كرم العمده طه ود البكري البطحاني عمدة أبرق ويلقى قصيده الفنجرى
بخيه على مسامع الجالسين بقرية بالدبيبه وكان ود الرضى حاضراً فأعجب بالقصيده وبكرم العمدة طه
فسأل محمد ود خالد عن حقيقة كل ما قيل وهل العمدة طه بهذه الدرجة من الكرم،
فأجاب محمد ود خالد بالإيجاب فإبتسم ود الرضي معجباً وإنصرف جانباً في المجلس ثم كتب قصيدة
أرسلها الى الفنجرى وقال له-هذه معاشاة شعراء كانت قصيده الفنجرى تقول
سلام ضيفان هجعه وعليكم غمه
يمرقق وجهه يقدح نور وفوقكم عم
مو قنيفيد بيوت سمع الكشيش وانضم
اب رسوه الكرف فوق الرمم واتسم
عشاى الضيوف بعد إنضمام الحايمه
فوقك كتير جادعه الوساده ونايمه
على اهل السيوف دايماً درقتك صايمه
جدك فرتق النيل فى الدميره العايمه
