تويت
المرنوعة
المَرْنُوعَة زَىْ شَمْس الغَمَامْ فِى طِلُوعَه
إتْنَينْ
المَفْدُوعَة رُخْصَة وبَالوَضِيبْ مَرْدُوعَه
البَى سَنَاهَا مَى مَخْدُوعَة عِنْد الصَّالِحَاتْ مَودُوعَه
بَانَه وَبُرْتُكَانَه قُطَيْفَه مُهْرَة وَعَسْجَدَة وَخُشَيْفَه
تَابْرَه وَهَادْلَة فَاقْلَة وَهَيْفَا يَانُسَيْم الصَّبَا الفِى الصَّيْفَه
مَتْبُورَة الجِّدَلْ مَلْفُوفَه أنْعَمْ مِنْ قَطِيفَة كِفُوفَه
بِى الهَيْبَة أمْ عَفَافْ مَحْفُوفَه تَتَلَونْ بِلَونْ شَفُوفَه
كَالعِهْن النُفِشْ قَدَمَاهَا بَى مَسُّه الحَرِيرْ أدْمَاهَا
تُوبْ الحُسْنِ رَاقْ عَمَّاهَا مُرْنَاعَة الرِّدِفْ هَمَّاهَا
كَالمُوزَة المِوَرْشِلْ مَاهَا بَوَّظْ للِقِلُوبْ مَرْمَاهَا
حِصُونْ صَبْر العِبَادْ هَادْمَاهَا الصَّادَة النِّفُوسْ صَادْمَاهَا
جَلَّ الصَّانِعْ الرَّيَّاهَا هَفْهَفَه صَفِّى لُونْ زَيَّاهَا
هَدَّمَه ورَدَّمَه نَيَّاهَا إيَّاهَا الفَرِيدَة إيَّاهَا
أخْضَرْ لُوْنُه أخْضَرْ تَاجَه لَمْ نَرَى مِنَّهَا إسْتِنْتَاجَه
الألْوَانْ جَمِيلَة نَتَاجَه كُلَّهَا للخَدَارْ مُحْتَاجَه
نَاضِرْ لُونَه زَايْنَه الحِفْلَه هِىَّ المَاخْدَه كَاسْ الحَفْلَه
بِالرُّوعْ والرُّعُبْ مِكْتَفْلَه دِى البَيهَا البِدَايَة وَقَفْلَه
شُوفْ لَيكْ يَا حَبِيبِى طِفَيلَه رَاسَه مِوَسِّدَاهو كِفَيلَه
نَاصْلَه الكَتْفْ مِنْ سِنْ فِيلَه شَرَفْ الأمَّهّاتْ تَنْفِيلَه
تَتْرَنَّعْ تَفَنِّنْ دَيرَه فُوقْ للعَيبَه جَادْعَه بِدَيرَه
زَىْ المُوجْ تَلاَعْبُه صِدَيرَه إسْمَ الله عَلَيكْ يَا بِدَيرَه
غَاصَّة وقَاضِى بَصْبَاصْ عَينَه والفَاطِرْ برَيقْ العَينَه
تَمْشِى الرَّنْعَه مِنْ دِرْعَينَه قَاصْدَه هَلاَكْنَا الله يَعِينَه
