تويت
فوقك داير اقول للناس مشاعرى كلام
وارسم بالحروف احساسى يبقى انغام
اغنيلك مقاطع من وحى الالهام
وفيض اشعارى فيك جواى نبع جمام
تلبسى زى عقد فوقك تختى وسام
تلوكو الناس زمن ميراث مدى الايام
ريماز زى شتيلا دابو فرهد وقام
رويان اتفدع شايل مدندح وخام
وشيك قمرة لمان يلجلج تام
يضوى الكون ده كلو وما يخلى ضلام
فاق جسمك حريرا جاى من فيتنام
صفاهو يخجل الدهب البيلمع خام
يا رطب العجوز وتفاح بلاد الشام
ويا العطر اليفوح ينساب مع النسام
ما اتغزلت فيك لكنى همت هيام
وقلبى عليك حنين مليان وداد وغرام
صبرت أنا فى رجاك يا روحى عام فوق عام
اتلهف مجيك واستعجل الايام
رغم انك صغيرة وما وزنتى جرام
الا انا عندى وزنك زى جبل مكرام
مناى يا غاية البانيهو من أحلام
تشبى قبل نشيب شان تمشى لا قدام
قدمك فى الفريق قط ما يكون حوام
ولا منك يجينى من المعاكى ملام
يديك ود حلال ولدا شجاع وهمام
كريم ماعونو حار زين فنجرى وعزام
فوق عرضك يقيف وعليك يكون قوام
يبقالك معاك سيد بيت ولى وخدام