عوض علي حامد " دون ذنب "

فى لحظة من غدر الزمان
فى ساحة فوق اللامكان
فى غفلة فى جوف الظلام
ولدونى حتى بدون حنان
انسان ممثل فى حطام
وصرخت ما حسيت امان
بين الكلاب بين الركام
ختونى فى اغذر مكان
لافيهو شمعة ولا زحام
سابنى وهرب يجري الجبان
ما ودع المجهول مصير
والقدر فى كف زمان
فى كوشة كان فى حزمة من كوم الوسخ كان اللكان
ولدونى اصلى بدون اسم
واول مكان في الدنيا خشيتو القسم
رسمو الرسم كتبو الكلام
اصفر عيونو بلا العسل
خدو الاثل وعليهو جرحه طفيفة فى الكتف الامام
واول اسم كتبولو واحد لقيط او ود؟
وجدوه فى وسط الركام بين الحطام
ووسط هذا وبين ذاك وبين بين
ياريت يكفى الكلام
*********
وبدت مسيرتى مع الحياة
مشيت اول اتجاه ونشأت بى اجمل اسم وشبعت فى الاكل الدسم
البس جديد فى كل عيد فى الصورة ضاحك مبتسم
فرحان ابوى المستعار العارف انى عليهو عار
لاكنو صار ما فى ايدو شئ بس غير يكتر لى الغيار
يبقى الغيار بعد السنين اجمل ستار
نلت العلم وملكت ناصية الكلم
وبقيت كبير اعرف كتير
وارك واطير ومشيت واصلت المسير
تاريهو كل يوم اسير اصبح اسير وعد العذاب
وتفضل لي الخطوة من المصير اسوا مصير
حزنا مرير يوما عسير اغلال ونير
تاريهو كان يادوبو انفتح العذاب
هجرونى اندادى الصحاب عانونى فى وقت الفرح
خلونى يوم جات الصعاب
وبقيت براى والريق نشف والدم وقف
لاكنو عاد تغلى العروق
تاريهو كان مر الزمن
وبرز على السطح الزمان الاصلو كان بدرى اندفن
نبت على ارض العذاب من دون عروق شوك المحن
يطعن ويطعن فى الجروح طعنات فى شان يزداد اساى
وجريت فى كل اتجاه والقى ما فيش زول بلاي
انا ما براى انا ليه براى
لا لى رفيق يفرج على وكتين تضيق
لا لي صديق يقطع معاي طول الطريق
انا فى مضيق داير الطريق
داير الرفيق نجدة غريق
او موية من جدول حنان تطفى الحريق
*************
كمل الصبر واليوم يمر والهم يدر
وجع الضمير الدون ذنب
كان الظلام وكان التمام وكان الكلام
وكان الحطام يوم جيت ازور
واتنسم الهناء والسرور
تهمونى زور ورمونى بالغلا والغرور
وبقيت ادور فى حلقة مفرغة فى متاهات
فى مساحات فى عذابات الصدور
وبقيت اتلفت وادور كايس اشارات المرور
انا كيف بديت من وين بديت انا ليه اتيت؟
وانا ايه لقيت؟
انا من وين بديت ومن وين انتهيت؟
وصار السؤال انا كيف انا؟
انا ليه انا
انا ايه انا
ودخلت فى زحمة ظنون
ومتين انا انا مين انا انا مين اكون؟
داير اجابات يا بشر
تحكى وتجيب مليون سؤال
كيف اللكان وين المكان
وليه الزمان فاتح على نار الشجون؟
انا مين اكون؟
انا ايه اكون