عوض علي حامد " امواج الشوق "

لا جلابة يجيب اخبارك وحالف ما يغشانى الطيف
وانتى بعيدة هناك فى مدارك يبقى الم فى اشواقك كيف
***************
الايام انا عارفه داسه جوه جراب الجور احلامى
وما شى بباقى الحاسة السادسة وشرك الهم منصوب قدامى
وانتى بعيدة هناك ما حاسة بي هم يصفع قلبى الدامى
محتاج ليك الحوجة الماسة يبقى الم اشواقك كيف
***
زاد فى درب الشوق درديرى والاشجان الهابة رياحة
وكل الدنيا سكون وهجيرى وانتى اظنو هناك مرتاحة
قلبى انا فكرتى تسيري تلقى حزين بى نخلة وواحة
وانتى مجنحة ما بتطيرى يبقى الم فى اشواقك كيف
*******
ما غسلت وشى من بعدك ساكنة كآبة دهور ودهور
وراجى رشاش الغيم من يدك من تانى يعودلو النور
افهمى انى معاك ما ضدك غيرتى عليك خلتنى اثور
آه انا ما بين جزريك ومدك يبقى الم فى اشواقك كيف
********
لا تقولى ظروفك وينه امواج الشوق فى اعماقك
اكسرى حاجز الخوف والرهبة الانتى معا هو محل ما ساقك
حدثى أي نسيم لو هبه وصي يجيبلى معاهو اوراقك
شوقى انا شوق حجاج الكعبة يبقى الم فى اشواقك كيف
أي كلام فى الشوق قوليهو قدر ما يسخى على لسانك
وادى قليبى انا لسه ادبهو من قيساب اللهفة حنانك
وشيلى عليكى هناك دسيهو ما بين رمشك وبين انسانك
حبك ده الانا عايش بيهو يبقى الم فى اشواقك كيف
********
كم شتت الشوق فى دروبك قلت يصادفك فى اسفارك
والا الريح الشالت توبك يمكن توصل بيهو ديارك
عاد لمتين بين حيك ووبك تسجنى شوقك بين اسوارك
ولو واصلتى كتير فى هروبك يبقى الم فى اشواقك كيف