قسم السيد عبدالرسول «ليل الغربة»

ليل الغربة
يا ليلاً طويل ، يا غربة ،
فجرك مالو ماب يشرق
وريني الصباح لو مرَّ ،
ليهو أنا ما قدرت لحق ؟
* * * * *
يا ليل الشجن والفرقة
مطبوقات علي طبق
حاضن لي همومي برايا
دمعي الفاض ملا المرتق
* * * * *
مشتاق لي منابع ريدي
للبلد النسيمه طلق
لي دوحة الظلال والخضرة
والبركاوي والمشرق
والقصب البعوم في الموية
جرجر وخلف البتق
والشتل المجبِّد دابو
قرَّب لي سبيطو يشق
كيف أنسى الجناين الوارفة
والجو الصفاهو روق
تتفتح زهور برسيمه
تملا الكون تفوح تعبق
* * * * *
هوي يا السمحة .. قلباً ليَّا
من تالاكي ضمَّة شفق
كان شفتي العذاب العايشو
بس موت أصلو مافي فرق
ما عارف نهار من ليلي
نازفة جروحي متعوِّق
وأصلو الشوق معصف بيّا
زي زولاً سقوهو عرق
* * * * *
راجيك صيَّفت أيامي
أشرب في سمومه حرق
والغيم البطل ساحاتي
يتفرق رعود وبرق
راجيك في مواسم الهجرة
لو كان ينقسملي رزق
بس شوفتك ... تبل أشواقي
أسعد وأبقى متوفق
* * * * *
ماك عارفاني هوي يا حلوة
لي لقياك متشوق
وماك عارفة البحب عينيكي
يفضل بيها متعلق
طشيت في بحورن رحت
في شيماته بدري غرق
* * * * *
في قسمات وشيك الحلوة
لي تلت إيديكي عشق
للقامة ودلال المشية
في رمان صدير ينتق
كمّلتي الجمال والله
زيك ما أظنو خلق
* * * * *
ذكراك ماب تغيب عن بالي
اسمك لي حجاب ورفق
وإن قلت الصبر يلحقني
ألقى الصبر متمحق
* * * * *
لامتين يا زماني القاسي
قلبك لي شوية يرق
رابع المستحيل والله
يداً واحدة بتصفق
* * * * *
بعدم إنت هوي ياالسمحة
حتى النوم جفاني قلق
طوّل من وجينات نايرة
من نوراً يلوح ويبق
من شعراً سكب شلالو
فوق أكتافه مدفق
حتى الطيبة فوق قسماته
حافيها الحنان وصدق
بي قربك نتوج ريدنا
يوم الحنة والجرتق
لا حاسد سمع همساتنا
لا زول في أضانا ينق