تويت
يلاك النقوم
يا زميل يلاك النقوم
لي شمال وطني نزورو يوم
* * * * *
بالرحيل اتلوَّمنا لوم
ماله دارنا الخير ماها شؤم
لا حسد لا فيها محروم
في الخلاوي نصلي ونصوم
للفرح ماعونا مردوم
جارنا ماب تلقاهو مظلوم
* * * * *
لي عروس النيل والشتل
والبقر والضان والإبل
اللبن راقد للطفل
وعيشنا في الأزيار ما كمل
الجروف طرحت سنابل
وخيرنا فايض ومالي المحل
* * * * *
لي سواقينا العامرة تب
لي فواكهنا الفي العلب
لي أرضنا الجايبي الدهب
ومجتمعنا الزين ما إتخرب
لي مُحمد وآسيا ورجب
وللقميري النقـَّد الحب
* * * * *
قرِّبوا أنصنتوا يا صحاب
من كرمنا وصلنا الصحاب
الأرض مزروعة تيراب
والجروف والبحر التساب
نحن للعشمانين قراب
ونحن أهل الضيف مرحباب
الشمال مشهور بالكرم
وبالدليب الدق ورزم
نحنا والطنبور ولاد عم
والبنات حافظات للقيم
من جمالن حار الفهم
الرسول عدُّوا جروحي كم
* * * * *
لينا جبل البركل ثبوت
في الحجار تاريخنا منحوت
ماب نخاف ماب نرهب الموت
وللعطاشى سبيلنا مختوت
نحنا للأخوان ماب نفوت
ولي عدونا الصاقعة أم خيوت