تويت
عشق الطَّلاسم
أبعدتنى الدنيا عنَّك...حاكمتنى بــدون محاكم
ضيعتنى مراسى حنَّك...فى بحر مليان طلاسم
ديمة مشتاق ليهو فنَّك...وشوقى ليك كلَّ المواسم
فى الخريف برجاهو دنَّك...يســـقى أرواح العوالم
وفى الهجير برجاهو حنِّك...يبقى ضُل نديان وحالم
ولو ربيع الدنيا حسنك..تحـــلى دنيانا وتسالم
ولو شتانا بيبقى منَّك....كــان بيدفا ويبقى طاعم
ولو نسائم الليل يجنَّك...تحلى فى الدنيا النَّسائم
واللّيالى بعيدة عنَّك..وحشة ظلمة بعيشا نادم
والأماسى قريبة منَّك....روعة رايقة وشوقا حايم
لو كتبنا قصيدة عنَّك...الكــــلام يحتاج تراجم
ولو تمارس فينا جنَّك...برضوا نهواك يا مسالم
يا المنُّور فينا سنَّك..غـالى إنت وماكا عالم
ما عرفت فى يوم أظنَّك..إنو حــبَّك فينا دائم
رغم جهلك وصغر سنَّك....ما بنقول مغرور وظالم
أنحن مرتاحين فى سجنَك......ما حنهرب أو نقاوم
وحتى لو بعدونا عنَّك....نحن نتمرَّد نصادم
نسكب الدم نفدى وطنَك.......ندحر العدو والمهاجم
بس هو كيف يغمرنا حنَّك....ويبقى عشقك فينا قائم
بسمة منِّى وبسمة منَّك......ننثر الحب فى العواصم
نظرة منى ونظرة منَّك .......نرمى قدَّام ما بنساوم
وهاك عيونى بيحرسنَّك...من حسود غيران وواهم
وربِّى يصلح فينا ظنَّك.......ونبقى فى دنياك معالم
يا حبيبنا لأنَّك إنَّك....شعب سودانى ومقاوم
