خالد الباشا " قصيدة بس "

عايزة انتي قصيدة بس ؟

شعري كلو كتبتو بيك ..

اغنياتي

امنياتي

والحنان ..

؟؟؟

عايزة روحي ...!!

هاكي ليها ..

نفسي ذاتا اديتا ليك

عايزة كلي !!؟..

وكلي ليك ...

عمري اصلي وهبتو ليك

الجاي والآن واللكان ..

....

عارفة ..لو خاتم منانا

لابسو في الإيد التسالم

وفي نعيم الدنيا حايم

منيتي ..

لحظة امان ..

ساعة من عمر الزمان ..

يحتل الشوق المعوبس

جوووه في بحر الحنان ..

اسريح من رهقي فيكي

وتكسب اشواقنا الرهان ..

..

انتي تأمري يالحبيبة

وكل طلباتك مجابا

لو علي والدنيا حاااارة

ابقى من فوقك سحابة

نخلة انتي تهزي فيها

ترمي ليك رطبا وحبابا

ابقى في بيتك اصايص

غرفتك ابقالا بابا ..

الحياة المليانة روعة

ابقى في الآخر كتابا

انتي اندهي في الأماني

وحلمي يبقى الإستجابة

وانتي اكتبي في الأغاني

وروحي لي شعرك ربابة ..

عارفو دايما احتياجك

ببقى يمة وببقى يابا ..



....

انتي بس اتمنى صمتا

قولي في سرك تعال..

قبل ماترمش عيونك

ابقى بيناتك حلال

يا اميرة انا تحت أمرك

وتحتو امرك لا محال

عارف الجبل البكسر

في ضلوعك (بركلال)

انتي أأمري يبقى عندك

رغبة الأحباب تهزهز

حتى اركان الجبال ..



رغبتك يانور عيونا

مابتقبل إلا حاضر

ونحن كلنا في عوالمك

فيها متمنين نسافر

نحن حاضنين امنياتنا

بي صبر راجنو باكر

تشرق الواطة وتنور

يمرقك عبق الأزاهر

يملا بيك جوانا فرحة

وتحتفل بيك المشاعر