تويت
نزف القليب
يا مهجة الروح البقت ... رويانة بي حنِّك سنين
كيفن مع الغربة القِست ... من تاني ألقاهو الحنين
كيفن وأنا الماليني شوق ... لي طلَّة الغالي الرَّزين
فتنة وجمال أخلاق وذوق ..... زولي السَّكن قلبي الحزين
زولي المرق من أحلى ضَيْ ... جد نورو زائد حبَّتين
يا بانة فرعها دابو نَيْ ... ضوَّاي قلوب العاشقين
يا بسمة في وسط الشقا ... ويا ضحكة في الزمن الضَّنين
أنا كايسو طيفك وما اتلقى ... يا ربِّي راح شقيش ووين؟
خلاني للهم والفراق ... واللوعة والبكا والأنين
ما أصلوا عشق الإنسراق ... ما بين خواطري ودمعتين
الأولى في ذكرى الحبيب ... هطَّالة ما خلتلي عين
والتانية تنزف من قليب... ضمَّاكا فاض بيهو الحنين
يا حبِّي يا أجمل عشِق ... عاجبك أكون دائماً سجين
أنا قلبي من قبلك فرق ...كان ديمة راكز وجد متين
لكنُّو من بعدك صبِح ... ما بيوعى الا وكت تبين
يا روعة يا زولنا السَّمح ... أنا قلبي ينزف لا بتين؟
أرحمني من عشقك خلاص ... ريِّح قليبي الجد أمين
يا أبقى لي دنيا وأساس ... لا فرقة لا هم لا أنين
