عبدالله محمد خير «سؤال»

هي ...
ماك مسافر ياولد ؟
أسافر وين أقع !!
يالسمحة مكتوب لي القعاد
طول الأبد
ويا حلوة لو فالي السفر
ما كت قبيل جيت وقعد
***
ودعتك الله
وكنت من جواي بقول
إن شاء الله مو آخر وعد
وأتمني ليك من قلبي
أسباب السرور يا السمحة
وأسباب السعد
***
لكن أنا ...
أنا ما فقد
أنا ما نأيت عن حسنك الضواي
حليلي أنا ما أبتعد
وياما سعيت علشان تكوني معاي
وياما أجتهد
***
هي ماك مسافر ياولد ؟
آخر سؤال ...
لكنو هد كياني هد
مضي كالوهم ..
وفات كل إدراك الفهم
زي السهم
لما إنغمد
***
في أعمق الأعماق هناك
أشعل سعيرو الما إنخمد
وفتح سدود الذكريات
خلاها ماشي بلا عدد
جابت حكاوينا .. الزمان
كانت مزاح
ياربي شن سواها جد
كان معرفه
كانت مودة .. وكان صفا
بين ناس البلد
***
هي ماك مسافر ياولد ؟
آخر سؤال ...
وياريتو لي ما كان ورد
كيفن أسافر !!
ما ظروفي أبت
وعيشتي بقت نكد
ودخلت في عتمة هموم
وزحمة مشاكل كل يوم
ما ليها حد
واتبدلت أيامي يالعاجباني
في دنياي زهد
***
هي ماك مسافر ياولد ؟
آخر سؤال ...
روح معاهو البال شرد
آخر سؤال ...
لكني ما لقيت ليهو رد
داير أسافر
وكل يوم بعدك مسافر
عقلي ...
بس فاضل جسد