تويت
الوداع المر
أخوي أحمد …. قَدَرْ دائماً لِمَات الناس
وقدر دائماً شتات الناس
قدر مكتوب
بَوَابِير الفراق تنبح تَوَلْوِلْ ضاربي عرض اليَمْ
تفارق الشط
سراب تصبح محطاتا …
تطول تبعد مسافاتا
تكوس شمس اللقاء الغرقت وسط ليل النوى الأبكم
زمان بدري رحيلنا وكنا نحن بطان
رحيلنا المُرْ
زمن شِنَط الصفيح فِيهِن عِرِيرِيِقِي وحِرِيفاً مُرْ
وَكِتْ رَحل الجَلاَء وصَفَّر لَفَحْنَا وسط عنابر الغم
عيوننا وكنا نحن بطان بتزرف في دموع الدم
نَحِيبْنَا ونحن نِتْلَفَّتْ .. نشوف نخل الفريق يرجف
وكت نرجف وداع يملأ الدواخل هم
يَكَسِّرْ في النفوس فرحاً صِغَيِّر تَاتَا ما اتكلم
ولا بنعرف منو الباكي ومنو المَبْكِي
ولا بْنَفْرُزْ منو الصابر ومنو البَشْكِي
قلوب ناس الفريق تنزف
مِنُو البِصْبُر وكت تهتف
كريم يا رب كريم أستر
على الراحلين بلد بي فوق على أم درمان
دي فوتة وعودة يا حِبَّان
ويا ما كان عزاء القايمين
ويا ما كان عزاء القاعدين
قدر مكتوب لمات الناس بعد أشهر
أخوي أحمد
زمن يا دنيا فَرَّاقَة وزمن يا دنيا لَمَّامَة
زمن يا دنيا حَقَّاقَة وزمن يا دنيا ظَلاَّمَة
زمن يا دنيا سَكَّاتَة وزمن يا دنيا نَضَّامَة
زمن يا دنيا شَيَّالَة وزمن يا دنيا خَتَّاتَة
زمن يا دنيا نَصَّافَة وزمن يا دنيا غَلاَّتَة
زمن يا دنيا سَلاَّبَة وزمن يا دنيا عَطَّايَة
زمن يا دنيا كَشَّافَة وزمن يا دنيا غَتَّايَة
زمن يا دنيا لَبَّاسَة وزمن يا دنيا عَرَّايَة
أخوي أحمد
زمن يمضي وعمر يرحل
سواقي فرحنا تِتْرَهَّل
أَبَتْ تَقْلِبْ قَوَادِيسَا
صِبَانَا جروفو تِتْبَدَّل تَشِيب تَنْدُب رحيل مِيسَا
نعيش رُحَّلْ
نعيش باقي العمر رُحَّلْ
يتامى وسط مطارات الاسى الطوِّل
وجوه مجهولة بِينَاتْ لُجَّة المجهول
بقايا أشباح تَسَاسِقْ دَايْشِي غادي وجاي
عَقَابَاتْ زول غُتَاهو الليل وساحات الفضاء الفارغ
عناقريبو البحر والهم وساداتو الشقا القاتل
مراميهو السراب راحل
هويتو ورق …..
دخولو خروجو بالأختام كما الأيتام
نَزَاكِكْ في سراب وسراب
نلاحق في وهم كضاب
نَسَابِقْ نجري فوق لا شي
أمل قدامنا متلاشي
كنوز مدن الخيال هَدَّتْ قُوَى خيلنا
ولِقِينَاهِنْ ركام وحطام
ولا قِدَّام ولا قِدَّام
سنين عمر الخراب ماشي
بلا قِبْلِي وبلا رأس خيت بِقَتْ طاشِّي
ونَصُد ذات يوم على أرض الهوى الأول
تراب النخلة والنيلين
يكون عمر الرماد قد ضاع أماني الفرحة راحت ولِحْقَتْ الزِّينِين
حليلنا … حليلنا وكتين الأماني تموت
نَصُد يا حسرة خالين الوفاض نرجع
نعوش محمولة في تابوت
نكون - يا حسرة - لا عايشين مع العايشين
ولا ميتين مع الميتين
مَحَلْ عِزْ الفراق والموت
أخوي أحمد
دا ياهو مصيرنا راجينا
نظل رَاجِنُّو كان روحنا كان جينا
وقُبَّال القدر ينزل تراهو حُكُمْ فراقو القاسي مُو رَضْيَان يَخَلِّينَا
تَرَانَا بلا خبر نَلْقَاكْ مفارق مَجْمَعْ الأصحاب
مغادر والرحيل يا أخوي غياب وإياب
مسافر وذكرتك باقية
معانا .. معانا ما بترحل ولا تَالاَنَا سَادِّي الباب
معانا .. معانا بي فِكْرَك
معانا .. معانا بي قَدْرَك
معانا .. معانا بي طيبتك
معانا .. معانا في حلوتنا والمُرَّة
ليالينا .. أماسينا .. مشاويرنا … ملماتنا
أهازيجنا … أغانينا
تظل فينا أخو أخوان وقِدَّامِي
مواقفك والخُلُقْ سامي
مكانتك في القلوب عالي
علي أخوان صفاك غالي
وفي بنيان صداقة صح
ركن والله كنت الساس
مكانك ما بْيَسِدُّوا الناس
أصيل في الحارة يوت نلقاك قوي وصامد
شهامة عز بطون شايق
محبة ناس وطن خالد .. مودة ناس بلد واحد
فراقك ضمة مُو هاين
تراهو على الوجوه باين نَوَدِّع ونحن ما قادرين
تَعَبِّر عن لسان الحال دموع العين
لسان الحال بيتمنى الرجوع لي سَالِف الأيام
بعد حال الشتات والبين
لسان الحال بيتمنى الصحاب في الغربة مِتْلَمِّين
لسان الحال بيتمنى لك الحال السمح والزين
لسان الحال بيتمنى لك العز والمكانة الفوق
لسان الحال بيتمنى لك الخير والرزق مدلوق
لسان الحال دموع العين
يقول لك في وداعة الواهب المنان
وداعاً يا أخو الأخوان …. وداعاً يا أخو الأخوان
أخوي أحمد …. قَدَرْ دائماً لِمَات الناس
وقدر دائماً شتات الناس
قدر مكتوب
بَوَابِير الفراق تنبح تَوَلْوِلْ ضاربي عرض اليَمْ
تفارق الشط
سراب تصبح محطاتا …
تطول تبعد مسافاتا
تكوس شمس اللقاء الغرقت وسط ليل النوى الأبكم
زمان بدري رحيلنا وكنا نحن بطان
رحيلنا المُرْ
زمن شِنَط الصفيح فِيهِن عِرِيرِيِقِي وحِرِيفاً مُرْ
وَكِتْ رَحل الجَلاَء وصَفَّر لَفَحْنَا وسط عنابر الغم
عيوننا وكنا نحن بطان بتزرف في دموع الدم
نَحِيبْنَا ونحن نِتْلَفَّتْ .. نشوف نخل الفريق يرجف
وكت نرجف وداع يملأ الدواخل هم
يَكَسِّرْ في النفوس فرحاً صِغَيِّر تَاتَا ما اتكلم
ولا بنعرف منو الباكي ومنو المَبْكِي
ولا بْنَفْرُزْ منو الصابر ومنو البَشْكِي
قلوب ناس الفريق تنزف
مِنُو البِصْبُر وكت تهتف
كريم يا رب كريم أستر
على الراحلين بلد بي فوق على أم درمان
دي فوتة وعودة يا حِبَّان
ويا ما كان عزاء القايمين
ويا ما كان عزاء القاعدين
قدر مكتوب لمات الناس بعد أشهر
أخوي أحمد
زمن يا دنيا فَرَّاقَة وزمن يا دنيا لَمَّامَة
زمن يا دنيا حَقَّاقَة وزمن يا دنيا ظَلاَّمَة
زمن يا دنيا سَكَّاتَة وزمن يا دنيا نَضَّامَة
زمن يا دنيا شَيَّالَة وزمن يا دنيا خَتَّاتَة
زمن يا دنيا نَصَّافَة وزمن يا دنيا غَلاَّتَة
زمن يا دنيا سَلاَّبَة وزمن يا دنيا عَطَّايَة
زمن يا دنيا كَشَّافَة وزمن يا دنيا غَتَّايَة
زمن يا دنيا لَبَّاسَة وزمن يا دنيا عَرَّايَة
أخوي أحمد
زمن يمضي وعمر يرحل
سواقي فرحنا تِتْرَهَّل
أَبَتْ تَقْلِبْ قَوَادِيسَا
صِبَانَا جروفو تِتْبَدَّل تَشِيب تَنْدُب رحيل مِيسَا
نعيش رُحَّلْ
نعيش باقي العمر رُحَّلْ
يتامى وسط مطارات الاسى الطوِّل
وجوه مجهولة بِينَاتْ لُجَّة المجهول
بقايا أشباح تَسَاسِقْ دَايْشِي غادي وجاي
عَقَابَاتْ زول غُتَاهو الليل وساحات الفضاء الفارغ
عناقريبو البحر والهم وساداتو الشقا القاتل
مراميهو السراب راحل
هويتو ورق …..
دخولو خروجو بالأختام كما الأيتام
نَزَاكِكْ في سراب وسراب
نلاحق في وهم كضاب
نَسَابِقْ نجري فوق لا شي
أمل قدامنا متلاشي
كنوز مدن الخيال هَدَّتْ قُوَى خيلنا
ولِقِينَاهِنْ ركام وحطام
ولا قِدَّام ولا قِدَّام
سنين عمر الخراب ماشي
بلا قِبْلِي وبلا رأس خيت بِقَتْ طاشِّي
ونَصُد ذات يوم على أرض الهوى الأول
تراب النخلة والنيلين
يكون عمر الرماد قد ضاع أماني الفرحة راحت ولِحْقَتْ الزِّينِين
حليلنا … حليلنا وكتين الأماني تموت
نَصُد يا حسرة خالين الوفاض نرجع
نعوش محمولة في تابوت
نكون - يا حسرة - لا عايشين مع العايشين
ولا ميتين مع الميتين
مَحَلْ عِزْ الفراق والموت
أخوي أحمد
دا ياهو مصيرنا راجينا
نظل رَاجِنُّو كان روحنا كان جينا
وقُبَّال القدر ينزل تراهو حُكُمْ فراقو القاسي مُو رَضْيَان يَخَلِّينَا
تَرَانَا بلا خبر نَلْقَاكْ مفارق مَجْمَعْ الأصحاب
مغادر والرحيل يا أخوي غياب وإياب
مسافر وذكرتك باقية
معانا .. معانا ما بترحل ولا تَالاَنَا سَادِّي الباب
معانا .. معانا بي فِكْرَك
معانا .. معانا بي قَدْرَك
معانا .. معانا بي طيبتك
معانا .. معانا في حلوتنا والمُرَّة
ليالينا .. أماسينا .. مشاويرنا … ملماتنا
أهازيجنا … أغانينا
تظل فينا أخو أخوان وقِدَّامِي
مواقفك والخُلُقْ سامي
مكانتك في القلوب عالي
علي أخوان صفاك غالي
وفي بنيان صداقة صح
ركن والله كنت الساس
مكانك ما بْيَسِدُّوا الناس
أصيل في الحارة يوت نلقاك قوي وصامد
شهامة عز بطون شايق
محبة ناس وطن خالد .. مودة ناس بلد واحد
فراقك ضمة مُو هاين
تراهو على الوجوه باين نَوَدِّع ونحن ما قادرين
تَعَبِّر عن لسان الحال دموع العين
لسان الحال بيتمنى الرجوع لي سَالِف الأيام
بعد حال الشتات والبين
لسان الحال بيتمنى الصحاب في الغربة مِتْلَمِّين
لسان الحال بيتمنى لك الحال السمح والزين
لسان الحال بيتمنى لك العز والمكانة الفوق
لسان الحال بيتمنى لك الخير والرزق مدلوق
لسان الحال دموع العين
يقول لك في وداعة الواهب المنان
وداعاً يا أخو الأخوان …. وداعاً يا أخو الأخوان
