محمد الحسن سالم حميد «الشوق»

الشوق من حاطفْ .. لا .. قاطفْ
إتلمَّ يهز ليك .. يا نوراى
يادرقة وسيف
يا حضناً .. كيف
من شر الصيف والشتا .. ضاراى
يا شعلة عِـز .. بقـّت جوّاى
عدّت بى ضلام بحراً عاصف
يا بت العرب النوبية
يا بت النوبة العربية
بى فردة نخوة .. بجاوية
أو شدر الصحوة .. الزنجية
دسينى من الزمن الفارغ
من ريح المتعة .. الوقتية
من شر الساحق والماحق
بين دبشْ المدن .. المدعيـّة
والليل إتحكـّر بيناتا
كحـّل بى دبشو عويناتا
يا شمس الناس .. المنسية
من الواسوق أبت تطلع
من الأبرول أبت تطلع
من الأقلام أبت تطلع
من المدفع طلع خازوق
خوازيق البلد زادت
يفيض النيل .. نحيض نحن
يظل حال البلد .. واقف
تقع محنة
ولا النيل القديم ياهو ... ولا يانا
نعاين فى الجروف تِنهد .. ولا يانا
رُقاب تمر الجدود تِنقَص .. ولا يانا
متين إيد الغُبُش تتمد
ولا قِدّام
تتِشْ عين الضلام بى الضو
تفرهِد شتلة لا هدّام
ولا فيضاً يفوت الحَد
عُقُب يا نيل تكون ياكا
ونكون أهل البلد بى الجد
يا مطر عِز الحريق
يا مصابيح الطريق
يا المراكبيى البتجبِد .. من فك الموج الغريق
جينا ليك والشوق دفرنا
يا نشوق روحنا ودمَرنا
يا المحطات الحنينى القصّرت مشوار سفرنا
ياما شايلك بينى حايم
لا الليالى المخمليى
لا العمارات السوامق .. لا الأسامى الأجنبيى
تمحى من عينى ملامحِك
وإنتى جايى المغربية
.. دايشى .. داقسى .. المغربيى
وشِّك المكبوت .. مكندك
سمسونايتك زمزميى
كون شِبِر .. طوريى .. مُنجَل
سِبحِى .. فانوساً مدردح
قلتى بيهن لى زمانِك
يا زمان الحاجى عِندك
يا زمان الآهة حدّك
لا تَطَى الوردة الصبيى