محمد الحسن سالم حميد «القلب يشوف قبال العين»

القلبِ يشوف قبّال العين
من قبلِ أقابلك شفتك وين
في ياتو عريس مخضر إيدين
بين حضنو حلم يلصف لا وين
والناس في الدارة إتنين إتنين
كل خطوة تشيله عديلة وزين
قوق قمريتين فوق كروقتين
قيساب الشوق نوريقو متين
يا رش الغيم يا ريحة الطين
يا بختي أنا وكل الصابرين
يا زول يا زين أنا شفتك وين
في ياتو صباح باهي ووضّاح
الطير صدّاح للزهر الفاح
صفق البرسيم للطل مرتاح
والناس أرواح في حضرة راح
العشق الدغري العذري الصاح
يا قومة بدري وفوتة الدار
من أجل حلم راجنو صغار
في ياتو محطة غشاها قطار
إندهده فيها وقضّى نهار
حس العمال تحت الأمطار
الربط الخط ما فكَّ الخط
يا كم في الخط هيلا وأنفار
والناس النار أم قلباً حار
فتحوها بيوتن للسفّار
الزول الوافي العوّافي
يدِّيك العافي من المافي
وما يأخد إلاّ الأخبار
لاقيتك آهن لاقيتك
في سرِّي ندهتك ولبيتك
مع إنِّي ولا خابر إسمك
لا الجيهة المنها لابيتك
إنت الإنسان الغنيتك
إتمنوا الناس إتمنيتك
يا ريتك تخبر ياريتك
كم صبرِ وعشم إستنيتك
لو قبلِ أقابلك ما شفتك
ما كان في حزَّتي حبيتك
أنا وإنت قبل ده إتلاقينا
شقِّينا على الدنيا جداول
جبدنا زمانا الكان عاول
والعالم سوِّينا جنينة
يا رشة غيمة عتاميره
ربّة عربان وطنابيره
قندول الشوق الحين لبّن
جاب لي بيّوضة عصافيره
يا ريح الزنج إذا اشتاقت
تفتِق بأنفاسه مزاميره
يا القمحة السمحة المدخورة
قسِّيبته قلبي مطاميره
أنا شفتك وين ؟؟
قبلِ أقابلك
بين دنيا الريد ومقاديره