السر عثمان الطيب «يا حالبة»

يا حالبة من عينِي الدموع .. يا صالبة فوق وتري الرنين
لا ليكي متمنّي الرجـــوع .. لا تاني عاودني الحنين
مهما يكون ريــــدك قدر.. ما ببقى مأساة عمري فيك
لا بين إيدَيْ قلبي انكسر .. لا سايبو مرهون بين إيديك
ما بشقى بعدك بي سهر .. دي الدنيــــا ما وقفت عليك
أدّيتك الريد الهطـــــول .. زيّــنـتو بي زخَّات مطــر
طول المواسم والفصول .. في سكَّتِك رفقة سفــــــــر
لكن قطارك فات عجُول .. وانا ريدي ليك مدُّو انحسر
لو إنت يا مفارقاني ريح .. ما ليك سكون ، لا مُسْتَـقَـر
أنا نسمة ، في الزمن الجريح .. حضَنَتْ ندى الصبح الأغر
بالصدق ، بالبوح الصريــح .. بهزم فواجع المُسْــتَــتَـــر
بنساك ، وبعدِك بستريــــــح .. مابفني عمري وراك ، هَدَر
لا الآهة بكّمت الفصيـــــــح .. لا الدمعة ذوَّبت الحجـــــر
لا من حشاك طلع المسيــــح .. لا كنتِ مريم في البشــر