السر عثمان الطيب «قهوة وعيون»

بساطك احمدى واخضر
بساطاتك مع الضحكة الاريحية
مزيج ابنوسك الاسمر
على بنبر
مزاجاتك بخور والقهوة بكرية
***
قيافة سكرياتك
رنين همسات فناجينك
متمرة وسط صينية
جمر شعلل هوى الجلاس مجانينك
عيونك فى الضو الخافت
قصاد عينينا رقابة
رموشن احلى هبابة
مراسيل الشجن والكيف
كما الزفة الملايكية ملامح طيف
مثيرات الهوى العربيد
مكامن لحظة الخَدَر الخرافية
ملت قرب المسافة البينا والبينك غنا ونجوى
تغرود وتغفو فى الصحوة
تزغرد وتصحى من غفوة
وفى اهدابا صمت الليل
مرافى اللوعة والشكوى
مذاق الرشفة من بهجة بريق نظراتك الحلوة
وطعامة الالفة من نكهة تراحيبك
رواقة طبقة القهوة
خضابك والندى الفواح
عبير طيبك
هزم حرف الكلام عنك
عقد لسنات مجاذيبك
***
نفس من قرفتك .. هيلك
نداك روعة تفاصيلك
كنسمة صيف تهبهب فى صفا ليلك
سلاف دغدغنا بالنشوة
حقيقة حلم عشناهو
مزيج ابنوسك الاسمر
مع الجلسة المسائية
ورواقة طبقة القهوة
وما فتناك ولا الزمن السمح فاتك
ويوماً ما قطارات شوقنا ترجع لى محطاتك
بلا جفوة
حترجع لى عيون حلوة
عيون كانت وما زالت
قصاد عينينا رقابة
رموشن احلى هبابة
تغرود وتغفو فى الصحوة
تزغرد وتصحى من غفوة
نوادعك ونصحو من غفوة
نلاقكى الدنيا عينيكى
ورواقة طبقة القهوة