تويت
كل يوم ليك حبى يكتر برضى شايفو عليك شوية
علمينى احبك انتى زى محبتك انتى لى
كلما الاشواق تساسق القى غيماتك سخية
فيض حنانك لى دافق يا المشاعرك صادقة حية
يا الحبيبة الشايلة ريدى من سنين بينات ضلوعك
جوة فى نبضات قليبك فى ابتسامتك وفى دموعك
حافظا فى مقطع غنانا صاينا فى الناسينا ذكرى
وفى ظلت زهورو وفى نغيم يا يمة فكرة
ديمة تحرس فى ربيعك راجا لما يجيكى بكرة
فى انتظار الشمس تشرق ياما صاقرتى الليالى
تكتمى الشوق المبرح وتندهى الاحلام تعالى
ناسجة خيط الفجر ابيض فوق طريحات الصبايا
فى دفاترن انتى رسمة وهن يساسقن للقراية
تحكى ليهن عن هواكى وعن حبيِب ريدو غالى
وكل ما الايام تولى وتشعل الحن والعواطف
لا بيهز قدرك ثباتك لا بتزازيك المخاوف
لا جبل صبرك تفتت فى وشى الريح والعواصف
ماسكى فى العشم الببرى قلبك المجروح ونازف
منك النفس البيطلع منو قوقاى القمارى
هدهد الزول البيقرع بالكوارديق والطوارى
الوصايا التبقوا عشرة
ساعة السفار تلوح بى ايديها وبى دموعا
لما تبقى رهاب عيونا وللبلد يصعب رجوعا
والدجناين والحوارى بين ضجيج مكن اللوارى
وحس نواحات البوارى بين دخاخين البخارى
حس صفافيرو الحزينة تفجع الناس التودع
الصبر يصعب عليها تنتحب تبكى وتدمع
وانتى بى اطراف طريحتك النخيل كفكفتى دمعو
يا الهموم الناس همومك الجرف خدرتى زرعو
البلد آسيتى جرحو والبطينين بيكى فرحو
بين ايديك قلبى المدلل
ياما فى روعة مشاعرك يستريح وينوم ويصحو
ريدك انتى كتير على لو صحيح انا بستحقو
علمينى احبك انت لو قليل اوفيهو حقو
علمينى احبك انتى زى محبتك انتى لى
علمينى عشان عيونك انده الريح للقوافى
تحتويك جنحات حروفى
بيك ترك عند السواحل فوق منارات المرافى
تحلب الغيمة الدرورة لى يبابات المنافى
غنوة تطلع من صمودك رمز للفرح الاضافى
علمينى بدون عيونك ما اكون لا غيرن ابقى
احيا واتنفس هواهن كل زفرة وكل شهقة
القى مأمن فى ضراهن لا اهم لا تانى اشقى
فى منامن وفى صحاهن
امشى فى سكة خطاهن وابقى ليهن ديمة رفقة
علمينى وعلمينى
كيفن الزول يفنى روحو ويرضى بالمقسوم مقدر
من حلاة ريدو البعيشو يدى مر الصبر سكر
ومن جمر صبرو المولقد ضو ظلمة ليلو نور
ومن ظلامات ليل عذابو يرجى طلعة صبحو تظهر
حتى لو غاب صبحو طول عن مواعيدو وتاخر
هو المواعيد يحتريها حتى لو لى عمرو ودر
علمينى وعلمينى
كيفن الزول طول حياتو يستميت فى ريد حبيبو
يبل الغالى ويضحى يرضى بالجايى ويصيبو
ينتظر حلمو الرجاهو يمكن الايام تجيبو
رغم انو السكة قاسية ماشى ما حاد عن دريبو
علمينى وعلمينى
كيفن الزول يحتويهو ريدو فى كل ارتعاشة
خفقة فى الزول البيهتف وعى فى اللحظة المعاشة
يرجا فى طلة حبيبو بالتباشير والبشاشة
زى تلهف زهرة ترقب بالفرح جية الفراشة
علمينى وعلمينى
الحبيب مهما ينسى برضو نغفر له ونسامح
لو قسى وما حس بينا ومهما كان غير قصد جارح
نحن نتحمل جفاهو لا بنصرح ولا بنصارح
بكرة يشعر بينا قلبو ويتلقى المن ايدنا رايح