السر عثمان الطيب «مسامحك»

كلما تقسى تجور على بسامحك والريدة تكتر
اعاتبك كيفن والومك غرامك قدرى المسطر
زمان من ايام صبايا زمن كان العمر اخضر
بشوف فيك حلمى ومنايا ومصيرى المكتوب مقدر
***
كبرت معاى شب ريدك متل تومى معايا يكبر
اتاتيهو متل جنايا الولى واحجيهو واسهر
اضاريهو واخاف عليهو كتمتو اتنفستو عنبر
سكن فى روحى ودمايا سرى وفى شريانى دور
***
على لو قلبك تجنى قسا ومن تالاى تحجر
اكوس لك عذر البريدك اسامحك وفى عينى تكبر
سنينم ودنين فى رجاكا قسالى وصالك تعذر
صبَر والدنيا العريضى تشيل من صبرى المصبر
***
بقيت غاية مشتهايا هواك اعتزابو افخر
هناء عمرى ختامو مسكك بلاك باب الريد مسوجر
وكت دابى لقيتك انت هواك فى دنيايا ازهر
كفاية اشوفك قريب عميرى معاك غصنو خدر
***
رضيت بالمقسومة لى كفاية على انت واكتر
كفاية يظللنى غيمك كفاى لو ما صب امطر
كفاية احس بى وجودك قليبك لى قلبى جاور
يعيشك حتى الثمالة شعورى بالريد مخدر
***
رضيت لو ماك من نصيبى حصادى ودهبى المجمر
كفاية عيونى التشوفك بريقك جواها نور
دحين اطامن وحاتك قليبى رهينك مسير
بلومو انا لو مرة لامك اعاتبو انا لو فيكى قصر