شمس العشق

طبايع الدنيا ذي شمسا تغيب تضلم تعود تشرق .
قريب شمس العشق تضوي وبعيد رغم البعد تحرق

تعالي دحين عليا قريب وضوي حياتي من عتما
ليالي الشوق بعيد عنك بقت حاسداني في نجـما
قليبي احتار مع الدنيا البقت سادية بي قســما
تجيب كابوس ورا كابوس ولي حلمي الجميل تسرق

كفاي ياحلوة اضوق المر وحاتك حالتي مابتسر
تفيض دمعاتي في عيني افتش فيها صبري واكر
وافر صاريا بالاهات اتوه ويتوه عميري يمر
ولاعارف مقبل وين مغرب ولا ماشي شرق

رميت تيراب اماني الروح علي ارض السعادة البور
قصاد ساقة البكا الدفاق عزايا عليها تسقي تدور
مقنب فوق طريفا زمن محاحي ظنونا بالطمبور
وطارد الزكرة شان الزكرة اخاف من انو ليك تشرق

خيالي نزف غناوي الشوق قليبي انا بالحنين أجهش
رموشي انا كيف يلمها نوم وطيفك بينا كان عشعش
كسى الاحساس شجون الليل كوى الزمن القليب تشتش
ودارع عيني في الافاق عذاي املي الافل يبرق

بكون بين الصحاب تاية بعيد في غربة في جواى
بفتش فيك يالحاسك متل قلبي الهواك ودماي
بنادي عليك فجأة واصن واجن من فاضي جابو صداي
واحس زمني الوقف شمتان يجر حبل الصبر ينتق