** حكاوي القمر **
الباقر الطيب عبد الحليم ( ود الطيب)

يا قمرة عليك الله الخلق
سواك تضوى ربوع
ما تضوي قبل دورين
وتبقى الضلمة نوح ودموع
وجيبي معاك سحاب الليل
يبل الجاف من العاطفة والينبوع
وعليك ربك احكي حكاوى
عن اهلي شخوص وجموع
رجال في الحارة والسمحة
يحبوا بعض يواسو ا الهامي والموجوع
محمد يا عطالله حليل وشوق
يا طيب النية لي صوتك المسموع
وعم الخير كنت الخير وفيك
الخير با ابراهيم علي المطبوع
وديل افراد من أهلي
شالوا صفات من المجموع
ويا قمرة ديل الكانو ا في غيابك
لينا الضو وكانوا دليل ولينا شموع
لا تمثيل لا سيناريو
طبع اصيل ما مصنوع
كل خلاف اكيدمحلول
وأي كلام كعب مرجوع
كانوا الضل وكانوا المويه
كانوا لحاف وكانوا اللقمة من الجوع
أهل بالحيل يعصروا الناس
لا شاري ولا بائع ولا مبيوع
ويا قمرة مهما كان جمال نورك
ضو اهلي أكيد ناير وكلو سطوع
ويا قمرة براي حزنان
على الهم الكبير مشروع
منو البيقدر من الخلفة
يواسي الجار يسند الباكي والموجوع
ويا قمرة منو البيقدر زي اهلي
يزور الحارة والمربوع
واترجاك يا قمرة تقلبي السن
وتحكي سوالف الموضوع
عن الأمات ولدوا رجال
من أصلا فريد النوع
بنات عمسيب وبنات أحمد
وبت صالح وبنات الدوكة والمنقوع
ويا قمرة عليك ربي تحكي
حكاوى عن اهلي شخوص وجموع
ديل الكانوا في غيابك لينا
الضو وكانو ا دليل ولينا شموع
ومهما كان جمال نورك
ضو اهلي أكيد ناير وكلو سطوع

ويا قمرة أوعك تنسي ويبقى اللوم
وخطأك انت ما مشفوع
لو ما حكيتي عن علي حامد
المعطاء وعن الدار عمار موسوع
وحاج الشيخ وطيب الروح
هادي البال حكيم موضوع
حنين مضياف زينا زين
حد الريد سلام ودموع
وحاج أحمد أبو ه عبد للقيوم
بيتو سبيل ناذرو شيوع
وبئر للحاج ود حاج طه
دلوه سنين نزول وطلوع
وعبد القادر احمد حامد
رد الحق والمغصوب والمنزوع
ود فضل الله بيرا تاني
منو الموية للحلة وبر ضو رتوع
وحيران العوض تحفظ يباركوا الدار
بالقرآن وآذان الصلاة المرفوع
وياقمرة نورك انتي للعشاق
وبي أهلي أكيد محجوب كمان ممنوع
لانو النور نور اهلي
فضل ناير و كلو سطوع
شمل الكل بدون فرزا
ولا تمييز بطون وفروع
في الخرطوم وامدرمان والسلمة
وفي كسلا وفي كوستي واي ربوع
في لندن وامريكا وبلاد الله
محل ما الشمس شروق وطلوع
و ديل نورا عم الكون
زي نورك يا قمرة كلو سطوع
وتبقى حكاوي عن اهلي
شخوص وجموع