مركب الاحزان
رامي قسم السيد

مركب الاحزان
دايرانى اغرق ليه براى وانا قدر ماأسعدتك شقيت
وانا مركب الاحزان خلاص خليتو فى بحرو ومشيت

يامركب الاحزان خلاص انا من بعد ترحال رسيت
وطنت نفسى على الفراق بى قسمة الاقدار رضيت

معليش بعد مرت سنين ماتذكرينى اذا نسيت
واحزانى ذاته بسيبه ليك لو فى الخيال يجمعنا بيت

ياغايبه تزعلى منى ليه ماانتى اخترتى الغياب
واناكنت اشيل اللوم واجيك كان ظنى فيك ينفع عتاب

كيفن افكر فى الرجوع وانا جرحى ماصدقت طاب
كيفن بتحلمى بالرحيق وأزهارى حتاها اليباب

ماقلنا بنشيل الصبر نتكل همومنا على الهموم
ونلون الأفاق فرح وندودر النوم كان ننوم

لو كنتى بى قلبك معاى اقدر اجيب ليك النجوم
ومن قبل مايطلك خريف تمطر سماكى بلا غيوم

ماداير اشوفك تانى يوم ومادايرأزيد لى همى هم
ماداير اعيد لى ماضى فات وانا تانى ما لى فيك عشم

انساك واقول تاريخ قديم عشناهو نحنا اسى وندم
سرق الامانى من الفؤاد واندسه فى الوجدان الم

لو انتى خايفه على اضيع انا كل حياتى معاك ضياع
لو قالو بى شمسك اعيش اوعك ترسلى لى شعاع

ماعندى كلمه اقولا ليك لاتانى بفرد ليك شراع
ومافى ايدى الا اودعك وماعندى قدره على الوداع