الوداع
شعر محمد الحسن محمد سعيد (حسون)

يا شادي ما طوّلتا ما غنّيتْ ..دحينْ الليلي غنْ
فوقْ أهَلي فوقْ أصحابي جُرْ النَََََََََم ْ وغرِّدْ..
زيْ عصافيرْ الفنَنْ...
وااللاّهي أصحابْ السرورْ..واهلَ السُرُورْ..زيْ البدورْ..
أهل الضمايرَالبيضا ..زيْ شُخْب اللبنْ ..
أهل النفوسْ الصافية..زيْ طَلََلْ الندى البلَلْ خدودْ ..
”مترة مُبارك“ في الصباحْ
أهل الشعورْ الحية..زيْ برْسيمْ مفرهد ْ في الرِّمالْ....
لِبْس البنفسجْ تاجْ جمالْ...وِاتلفحْ السُنْدُسْ وِِِِِشَاحْ...

لحَظاتْ قُلالْ نصْعدْ نشِقْ جوفْ السحابْ
لحظاتْ نشوفْ أرْضَ الوطنْ نيلو ونخيلو رِهابْ رِهابْ
ونقولْ حِليلْ ريحة التراب ونقولْ حليلْ جَمْعَ الصِِّحابْ
ونقولْ حليلْ كل العَقابْ
عادْأبقو عشَرة على العقابْ.. باللاهي يا“ نورة وحسنْ“

قولْ ودّعُنْ باللاهي يا عصفورْقَبُلْ نطوي المسافاتْ والزمنْ
قولْ ودِّعُنْ باللاهي يا عصفورْ خلاصْ الكبتنْ العجلانْ رَطَنْ
قولْ ودِّعُنْ باللاهي ياعصفور خلاصْ صفرْ قِطارْ الفُرْقة....
بَشْتَنْ بي القلوبْ بلحيلْ..

وداعاً يا جمال الشيلْ..
وداعا يا حبايبنا البعدلواالميلْ..
وداعاً ياشتولْ الكُرْشة والقُنْديلْ
وداعاً يا جناين المنقة..يا زينة ْ ضِفافْ النيلْ
وداعاً ياطنابيرَنْ ترِنْ جَمْ بيتنا طولْ الليلْ
وداعاً يا زهورْ اللوبي والبِرْسيمْ
وداعاَ يا قميرِيْتـن تنُوحْ بي حُرْقة فوق النيمْ
تغالِبْ عبْرَتا الخانْقاها والدمع البحاكي الغيمْ
وتقول ليْ كيف تسافرْ..وكيف تسيب الخِلاّ والسُمّارْ
وتقول لي يا عشايْ باللاهي أوعكْ تقطعْ الأخبارْ.

مُحالْ أنسى البلادْ الرافلة في حُلة جِنَانْ رضوانْ
مُحالْ أنسى القلوبْ الطيبة ضاقتْ لذ ّة الإيمانْ
مُحالْ أنسى الخلوقْ الصابرة تكْدحْ والجبينْ عرْقانْ...
يجودْ بي خيرو..يرْوِي قريرو..يخْضَرْ كلُّ يومْ بُسْتانْ
مُحالْ واللاّهي يا حُمّدْ سعيدْ..يا الدابي..يا مامانْ
مُحالْ واللاهي يا أصحابي..يا أحبابي يا نورْ عيني..يا خلاّنْ