نحنا ماني سكارا فرحانين برانا

يا حليل الزمان الفات
"شعر محمد الحسن محمد سعيد(حسون)
ياحليل الزمان الفات
أيام كنا نحنا سغار....وكنا بنرعى
في زمن الرحيط أبشرعة
سيد الكسَة.... مابيندسَا
والباقين بيلعبوا..حاشة
"ناقة حاشة..بت كباشة
تمشي وترعى...تملا القرعة"

والقرَاع..جضع طوريتو..شال كوريتو
في ضل الكريقة قعد...ضرب قرَاصتو
كركع من حفيرو..وقام يسوي.."الباع"
وبي صوتن مهمسس قام يغني يقول
"نحنا ما ني سكارى...شبعانين برانا"

يلاكن أرح نندلَى
خلوا الطاب ...أرح نندلى..
من"يوم"..لا"ولد"..لا"تلة"
اكتلوا"أبدك"...وارح نندلى
يللاكن نشوف الفن...بي تحت المراكب جن
والرواسي واقف بي هناك بي...بي غادي..تالا السارة
من اوليهيو..بي طول حسو غنى يقول
"نحنا ماني سكارى..شبعانين برانا"

وديك واحدين...هناك عايمين..
دي أصلها قالوا"عومة المرقة"...يارب لا شراق..لا غرقة
"عومة المرقة"ديمي تطول..وحارة الفرقة
وبعد المرقة..دستة منقة....فرحانين..كل واحد يكد..ويقول
" نحناماني سكارى....شبعانين برانا"

والهوا إن وقع يادابو....قلنا حبابو
وبي "تمر الهبوب" الجابو
بي قتابو...بي عتابو....يملا جرابو
ومن قيسابو...احمد شالُو كيلتين باعا في "دكام"
ما ندهده...رجع قوام
ود الحلة...ما ندهده...رجع مادلَة...
رجع مبسوط....ولاكين غايتو...في مخلايتو
يامصيوب ...شنو الجيت شايلو؟
قال لي أمو "بس شن دايري
دي المخلايي...فيها قزازي...فيها محايي
وطرطش لي الكلام برَاحة غنى يقول
نحنا ماني سكارى...شبعانين برانا

رو ّحي غادي...يا حبّوبة
نحنا شركنا.....في التروبة
قشوا الدكة...قشوا الدكة
لحميرة جات تنتكّأ
لكودِي....حمار جدي
ياستار...أوع تجيهو بي عن صفحة الهبار
ياستار....الطير طار...فيشان واحد هناك كورك
ومنو ليهو غنى يقول
نحنا ماني سكارى...شبعانين برانا

يلاكن كتلنا الشوق...نلعب في القويز الفوق
هولبْ لبْ...كم في الخط
دحين مو تماني..؟..شد واركب
"يابركة دعول..لي الحول
"يابركة فكي..ترمي
وهناك بي غادي قاعدي حليقة
لا بلال...ولا إشميقة...من الفيقة
كل واحد يغني يقول
"نحنا ماني سكارى...شبعانين برانا

أضربوا الكف...واعدلوا الصف
جات أمونة ...تتنى..اتقول عرجونة
أضربوا الكف...واعدلوا الصف
جات أمونة لابسي الشف
أضربوا الكف...واعدلوا الصف
وخلوها اتخمج الدارة
خايلات دبلتا..ونقار
خلتنا اتقولوا سكارى
لاكين نحنا ماني سكارى...فرحانين برانا
ياهلنا ماني سكارى...ست الناس معانا

والحجاج هناكع في "القرونة" سمعتو نقَّر طارا
ياحاج ..في "القرونة" سمعتو نقر طارا
قوماك ..في" القرونة" سمعتوا نقر طا را
أمشاك "للقرونة" ..سمعتو نقر طارا
دا "الحساني ود ابجارة"...بي صوتوا اتقوال زمبارة
بشتن بي قلوبنا الليلي..ولَع نارا
وكتين قال"..عيب شبابي الما رحلْ...واللاهي لي ذاك المحلْ
جيناكا يا كاب الهملْ..لا دنيا...لادين...لا عملْ
"يانور....هوي يانور...هوي يا نور
والدماع جرت بي غزارة
والحجاج ملوها الدارة
"ود حاج طه"و"حامد"..وجدي"أحمد كارة
وكل الناس تقولوا سكارى
نحنا في مدح الرسول نتشاف تقولوا سكارى

لاكين حاشا ماني سكارى...عشقانين برانا