ربّع كريعاتو وقعد

ربع كريعاتو وقعد فى الدونكا جنب الصاج مع أمّو الدقيش
قابض كبيبايتو اللت الشاى فى اديتو, ويبكى ماعستيلنا ليش
داير يقرّض من يقوم من نومو ماخساهو دار يملا الكريش
ويصرخ فى امّو وقجة الدخان مضايقاها وتقولوا بشيش بشيش
واقودنا كملان من امس وكاشنت اولع صاجى بى نار العويش
اكان ألحّق اعوس لى من قدّام سناسن كسرى خايفى من النبيش
امرق كدى اتلفت اكان القالى عود عودين جرايدن فيها ريش

النار دى ماشى تموت خلاص تكبرلى ياشمّى وعشاى انت وتعيش
نار العويش متل الكضب قاطعى الطعم ودخانا كلو يروح فشيش
تعلق سريع وتهبد سريع طوالى زى فورة اللبن وتطفش طفيش
والمشكله العيش موسمح عقبات وكم هين من مريق طحنن دريش
لايقتهن وخمرتهن والصاج برد وشافعى اليلاهى بهم عطيش
يارب افوت لى فاطنى جارت اجيبلى واقود والا اى دلوق وخيش

سمعت بكاه وجات براها جناك ينبح من صباحات الله مالو
انت دلعت الجنى وعجنتى طالعى حسوسو حسك ذاتو شالو
انت كان ماك قادرى خلينى اللقوم اهريهو ليك لا ترتي حالو
فاطنى موغلتان انا الغلتانى شان جيعان حسب صغرو وجهالو
ماهوطالب البسكويت لا الكيك طريقة كسرى بس غاية منالو
وانا الواقود نسيت ماجبتومن الساقى لا اتزكرت لاكلمت خالو
اصلو ياهو ابوهو من ما مات ابوهو دخرنا والكافل بدالو

فاطنى جارتا خبّت الدمعات بكت زين وضمّت الشافع عليها
شالتو ورجعت على بيتاوتراضيهو وتلقم فيهو كسرتا بى ايديها
وكلما تطرى الحديث الدارتحس بالغصه شان تقصيرا فيها
كيف نكون جيران وماحاسين لقمة الكسرى جارك مشتهيها
كان هونفسو عزيزه ليه ماتسالو وتفقد حويلتو بلا نديها
وغايتوياإخوانا حق الجار صعب وجاهلنو ماعارفينلوجيهة