قدرك وين مشيت جاييك

لسع انت فى الرحراح وماك عارف زويلك راح
ياشالو العرق سافربو يا كان فى خشم تمساح
والحال انت وصوك بيهو قالولك شقى وملحاح
وما يغافلك يعدى القيفة مو زولا نجيض سبّاح
وانت سرحت وين خليتو يادوبا الحكايى صباح
غرق ومافيش عشم تلقاهو واليتعاقبوا الصياح

لاتعزّب رقبتك ساكت امش إتناول ابرفاس
كلّم ودمضوى يجيبوا ما زولا خبير كوّاس
واليجمعلو كم تنفار يكون بيناتن الغتاس
اخيرتلقى الجنازى تجيباشان مايمسكن وسواس
وانا بطلع اكلم خالتو ديك ست الجلد والراس
وعاد شوفلك بلد امشيلا والله الامر حساس

هوى آفاطنى سمى اسمالله الموت حق قدرمكتوب
حكم فوق الرقاب فارجنا لكنو الصبر مطلوب
دحين وداختك المن فوق غرق وياهوالعمر محسوب
وبالرفاس يفتشوا فيهو والقوز بى تحت مقلوب
هسع جيتا من قدام والحرّوم يجوك يادوب
طاقات الزغاريت بره واقعات فى الأحى والووب

يازول انت من وين جايى تفلح فى الخبيرالشوم
ديمى عليك خارتو صفق وسامنّك حسين البوم
لايبقى الجنى القاصدنو احمد ودعلى المرحوم
يالغبيان جناى ييداك راقد بى هنوك محموم
جاتو الوردى بى رجفاتا ختيتلو البطاطين كوم
من دخل البحر حسّاباشان كدى ماشبع فى العوم

فى الراكوبه ديك تلقاهو قولو طويل عمرتاريك
هيى قوم يابخيت الحال وبابرفاس يفتشوا فيك
ونايم فى عنيقريب خالتك الدايما ترافى عليك
وناغمو مرتين وتلات ياجنى ها! النضم موليك
سقطيب والعيون شاخسات سنونومشبكات شبيك
تبن راسو ولقاهو قضى قدرك وين مشيت جاييك