يوم رقد الزعيم مستشفي اختارنا الالاه ايانه
والله العظيم ياعابره ماعارف امال عيانه
ليه ماليه الرساله مظنه ماك عارفي الملامه اهانه
كان تنتظري لامن اجيكي بعدين قولي لي ذعلانه
لو كان كت سامع بيها بس لو ماقعدت عشانه
ذي دي علي الاقل ياعابره كانت فرصه لي لقيانه
عابره مع الجمال الضاوي نفسك في الدلال شبعانه
مابتحترفي مهما يبقي انك كنتي يوم غلطانه
عابره عشان لقاك بي فرحه بخمد في السنين نقصانه
علي حساب ايامي ذي فرح لهيب بالذانه
ذاكرك في غناي بالدغري ماذي البقولو فلانه
وعارف لو دخلنا ضفورنا الناس برضو ماخالانه
والسفر الوراهو لقاك مرغوب لو مع الهجانه
كيف الحال معاي في ليلو يصبح بكره في السجانه
متقدم عجاجو اللاوي طاوي الباديه بي عربانه
في ارضا يباب ياعابره تحلم بالرعود وديانه
تمشي بعد مسافه تلاقي عربان في المد شقيانه
تحتار في هدومها الفوقا كابس بالعرق قيطانه
والواحد تشيلو الحميه ما الناس مابتعيب اوطانه
تسالو عن شتاهو جوابو نحنا قدر بردنا قتانه
في الافق البعيد ياعابره اشجار في السراب غرقانه
وصلت الكابه حدودها والبير في الوهاد عطشانه
مافي نقص غيار ياعابره حتي ولا اسم شفخانه
وانتي عشان ذياره بسيطه قالبه الدنيا بي اركانه
ماحاولت اذيد يا اماني والله العظيم بي امانه
دي الحاله الوصفتها ليكي غير لغة الشعر واوذانه