غلبني هواك عرفت الريده تاني
وسواد عينيك يا إيمان سباني
علي حفر الغرام صوتك هداني
وبلا اشعر جمال وجهك رماني
بنات جيلك هبل لا معني تاني
يجارن في الزمن والدنيا فاني
شنط وأقلام دلال والشي الفلاني
البضيف فوق الشفاه لون إرجواني
دلع فايت الحدود منو إعتراني
شعور نفرني من كل القواني
مشيت عاشرت بت باخوس عساني
ألاقي الراحه في نغم الأواني
أقبل عينها مغصوب ماني زاني
غصبي أساي عشان النوم اباني
طريق العفه هو الباعني وشراني
عشان إخترتو في زمنا أناني
عبس وجهو القبيح لمن لقاني
رابح في سباقو حصان رهاني
غلبني هواك عرفت الريده تاني
وسواد عينيك يا إيمان سباني
بشعر في وجودك بي بياني
ولا إبن الحسين في شعب بواني
إذا إتواضعت مسحور المعاني
يظن يوسف بشير إني التجاني
وأكون نشوان قدر ما تبقي داني
بدون أهوي المجون زي إبن هاني
محاسنك في زراي بشت أغاني
سقاها سحاب كتاب الأصفهاني
من العجب العجيب أو جور زماني
ما أجيد أشعاري إلا بعد أعاني
حكاية الماضي وحدها مزعجاني
خيوط زكراها لسه مكبلاني
زهور أسقيتا من خالص حناني
وغرست بزورا سابق لي أواني
جنوها الغيري والزمن أصطفاني
أنا المظلوم ظهرت كاني جاني