سكة رضاك

عمرك يطول يمة و تتحقق الأحلام
عشان المحنة الفيك تبسم و ما تنضام
فرحك بيفرحني يعيش جواي غرام
يا جنة الدنيا و سعادة الدارين
يا عش يضم همي و حنايا بين نارين
صدرك حنين يمة في كنفو مضارين
نتكل عليك عيشة لقمة حلالاً زين
تسهر علي و جعي نتألم الاتنين
تبكي الألم يمة و اتلحف مرارة البين
***
ما ساكنة في الأحداق ضاميك رمش العين
ما مكمن الأشواق روحك هي روح الدين
و صاني ربي عليك يرضي لو ترضي
رضاك علي يمة يخلي البلاء يعدي
سيبي الزمن يهجر
في سكة ما تودي غير سكة رضاك يمة
سكة عناقاً حار
يتواري من ضلمة حضنك ملاذاً بار
راجيك تزفي الروح لآخر المشوار
راجيك يا نسمة يا أنبل التذكار
عشان انتي نوارة ملكة زهور الدار
ليك الفراش يرشف من طعمك انت احتار
سكّن جناحو عليك و ليهو انهزم تسفار
حطّ رحالو عليك ودّع زهر ودّار
سكة رضاك يمة يا مستودع الإسرار
ملتفة النجوم حولك تشكي ضلام الليل
راجية القمر طلة
يمة العيال نامت و انتي ليلك ليل
ليل اجترارالهم أحزان كجرف السيل
يا زايلة عوج البيت
طبطبتي دمع الخد جبرتي زلتي الميل
ورثتي صبراً كدح روي من حنانك نيل
هو ما عظيم منك من
دون عيونك ديل يسرح بعيد و يروح
في وادي دربو الويل