قـلادة فـال

عترت عليك من طول مدة
لقيت عينيك بعد قلبا صبح يسأل
و يتبتل
عشان يلقاك
نتقابل تقالدي رويحتي بالترحاب
تسالمي عيون
تحرك في جوايا عذاب
عترت عليك درهم حظ
و مكسية وشاح أبيض
و نور قمرا طمس ظلمة
علي أرض الغرام عمَّ
يصارع في زمن أشتر
يلملم في كلام طيب
عشان جوايا يتسطّر
عترت عليك وسط زحمة
وسط عالم عرف طبعك
لقاك ترنيمة تتنفس
من جور غربتو اتونس
عشان بهواك طريق الريدة ما ادنس
بيك انتي صبح طاهر
يطوف بي مكان عظيم نادر
تفوح نسمة و تنعش لي زمن قاهر
علي تزدان فرح آسر
عترت عليك يا زهرة
يرشف فيك فراش حاير
عترت عليك رغم الكان من الأهوال
وجدت بهاك طهر مثال
غرامك انتي سترة حال
كلامك لي قلادة فال
عترت عليكِ دنيا حقيقة ما ها خيال