جايى من زمنا مجافي جايي عشمان يملى إيدو
جايي يملى جسيمو عافى وينصلح حالو وعويدو
إنت وينك يامهاجر يالمغرب من وليدو
مانويت قرر تغادر والله قيدك زاد حديدو
لامتين للراى تشاور هو العمر تقدر تذيدو
ولامتين شوقك يتاور يتقد يرسل بريدو
يامراسي الشوق تعالى وخلى يطرى زمن جديدو
وخلي ينزل من عوالي وخلي ينزف دم وريدو
وكتن الشوق جوا خالي وماشى فى غيو وهويدو
وراضي بالهم مو مبالي فى بلاد ملوية إيدو
فاقد الحب فى حياتو فاقدا مصلايتو ومسيدو
أمسياتو واغنياتو والنخيل بى ضل جريدو
والصغيرين البهاتو كل يوم صابحنلو عيدو
أصلو قرب ينسى ذاتو ينسى تاريخو ويبيدو
أما يرجع لى ديارو وإما يتجهجه وحيدو
أو ينوح يسكب حسارو بالدموع إن كان تفيدو
أويطنش لى صغارو ينسخت يرقع جليدو
وتنسى كل الناس خبارو إلا زولا كان بريدو
اليعيش ينفق عميرو بين مكان شغال وسيدو
يومى وحًدو فوق سريرو بالرقاد ورم خديدو
ماهو عارف وين مصيرو راجى للاقدار تعيدو
عاد بعداك التجيرو وللزمان تلجملو كيدو