ياقاعدى فوق راس الحروف من بالى أبداً ما بتغيب
منشرى بين شعرى وغناى باقالى روض مرتع خصيب
مسجونة ما بين ريد وريد فى الذاكرة تلفح كاللهيب
لو ظانا انى انساكى يوم بنساكى لو ينسى القليب

شتلة رجاى زرعى القبيل ساقيها فى فصل الربيع
تعبان عليها زمن طويل حا حيتا من الناس جميع
مزروبة بى ُحسن الكلام مطبوعه بى أحسن طبيع
حكم القدر اداها زول وادانى طقة وقع صريع

أبحرتى بى سفن الضياع فى عتمه دامسى الدنيا ليل
اهملتى عهدى الكان معاك أرشفتى مشوارى الطويل
حملتى كل الكان ظروف عاد يا ظروف حملك تقيل
فتشت لى قلبك دريب لكنى مالقيت ليك سبيل


بعض البشر أمثالنا ما بضوقو طعم الخندريس
مكتوبلو انو يعيش حزين طول عمرو ما يحصلو ميس
يسرح مع نظمو الخيال قاعد براهو بلا جليس
يزرع مساحات من جمال يرويها تنمو يعيش تعيس