يلا قومى يا بنية قومى حبيبك راجيك تقومى
ده فارسك لو فات وروح عميرك كلو بتنومى

لهيبك يحرق حبيبك يخلى دوام فى الهجيرى
يباريه اتر دريبك يقصو وراك ديرى ديرى
يقول فى سرو بيجيبك ولو فى أيا مو الأخيرى

أقنعى بى طيب وخاطر وقلعى فى بحرو عومى

نصيبو يكون من نصيبك معاكى يمسك الحريرى
قليبو يميل من قليبك تنومى عيونك غريرى
تجيك احلامك تزورك ومع احلامك تطيرى

تفارقى همومك تسيبك ويفارقك حظ سئ شومى

سيد الحرف المدون وصاحب الطرق الفريدة
مسيد ودأبنعوفنا ومأيد فارس القصيدة
يضرى الواطة ويحرش ويحرقلك فى المديدة

يضيع فيك ويودر وكلامى إن ضاع ليَ لومى

يسيبك يرحل يغادر يكون فك مراكبو مدر
شياطين شعرو بتسوقو وتتوه فى وادى عبقر
كلامو الحجر المسلط محل ما فناهو كسر

بشيش صدى على البريدك بيمشى محل منتى تومى

حبيبك يرسم خطاك ويداريك من المآسى
يعيش بى جنبك ومعاك وسفينتك ترسى المراسى
يمدك ويوصل مداك وتفوتو الخدر الخماسى

تطيرو فراشات تصفق وتنغنغو فى الفرحه يومى

عبيرك يلسم نصيرك يوصلو حد التماسى
ينقد فى الساحه طيرك جنى وكودى ودباسى
توادع مرتاحه عيرك مأمنة من القواسى

محملة زاد كلو خيرك معاكى مكان ما تحومى