بابكر محمد خير «رثاء عبدالله محمد خير 2»

تقليص
X
 
  • تصفية - فلترة
  • الوقت
  • عرض
إلغاء تحديد الكل
مشاركات جديدة

  • بابكر محمد خير «رثاء عبدالله محمد خير 2»

    بابكر محمد محمد خير
    الموت اصلو حق لكن وقعتو تقيله
    في باكر يجينا إن ماهو جاي الليله
    آه من الألم من المصايب وويله
    واه يا خال تموت وتموت معاك قبيله
    يا زين الرجال يا زول طويل التيله
    يا الزاهي البهي ونفسك صفاتا نبيله
    كت يا خال ادور في الموت تكون لي حيله
    كت بختار رويحتي تكون فداكا بديله
    من يومة رحل خليت قلوبنا عليله
    وكم صابا المرض واتبهدلت بهديله
    لو دايرين نفيك حقك تمام بالكيله
    بس نقعد نكيل الكيلة فوق الكيله
    ولو شعرانا دايرين يحصوا كل خصيله
    يغلبوا شهرزاد في ألف ليله وليله
    وينكن يالحروف أبكن معاي الليله
    عزن واندبن زولا ماثروا جليله
    أبكن وطال بكاكن تاني مدة طويله
    ما دام فات رحل زولا يعدل الميله
    وينو الكان يصونكن فوق بنية جيله
    وينو الكان يدوزنكن قصيده جميله
    وينو الكان يخوجل في الليالي يجيله
    وينو الكان يكون في الحفله يا هو خميله
    راح سيد القوافي الكان يطوع خيله
    وأتوسد معاك يالدابي وسيد الريله
    خلانا الحياه وخلانا قال وقيله
    وخلانا الأماكن الكان قعد يمشيله
    طلق للمواسم وطلق أي متيله
    وطلق للشعر خلاهوا لي ناس ديله
    ود عبدون حياتنا معاك حليله حليله
    والاسره الوراك المولي يبقي كفيله
    كت بين الرجال راجل مواقفوا أصيله
    وكت بين الأهل مدخور فرش قنديله
    كت في الحكمة بين الشعرا بي مانديلا
    وكت للناس هموما تصر تكوس حلحيله
    نبكيك ولا نفرح في الرويحة رحيله
    شان ارتحت من ألما مساكنو قليلة
    ياناسي الصبر من صبرو ضج وعيله
    اذكروا في النفوس بي خير وحسن شميله
    عزوا قصايدو ديك الكان يغني يقوله
    عزوا بثينه وكتين ضاع عليها جميله
    عزوا أصحابو ناس توفيق وود شوكيله
    عزوا فديوي دي الكان ليها دوحه ظليله
    يا توماتو أبكن فيه كل نفيله
    والتبكي القصايد التاني فاقدي دليله
    تبكي ارض الشمال بي كل نخيلا ونيله
    وحبات الرمال عرباانا خورا وسيله
    تبكيك كسلا يبكيك نهرها وتوتيله
    تبكيك دار سلام دارفور ودار أم بيله
    تبكيك الرياض والبطحاء والتفصيله
    وأعراق الهنود والبنقلا ومانيله
    ود عبدون سريع سبت الحياه واكليلا
    وكم يتمت ناس زاد يتمها الباقيله
    وادعناك خلاص يا سيدنا سيد الشيله
    نلقاك في جنات دانيات مدندح شيله
يعمل...
X