المتكبر

وفوق كم جاي تتكبر


ترابا بي حنان ضماك

تجيهو الليلة تتنكر

أو انت تكون ولد ريقن

أو جدك يكون عنتر

تكون بلجيكي اوهندي

كمان لودرت تتنصر

وانت الشايفني زول مسكين

عندي المهدي زي عنتر

عندي ابقرجة والقرشي

أحسن من الف كارتر

وعندي مهيرة بت عبود

أخير من مارغريت تاتشر

بضم بي شوق تراب بلدي

واختي ان كان جفاها مطر

واشيل سوداني في عيوني

ولو كان كلو اتصحر

أكنت عرفت حب بلدك

اكان يوم ضقت كسرة كر

لو انت شربت يوم الشاي

من نقاع قعر الجر

اكنت عرفت حب بلدك

لو ماكنت ودبندر

اكنت تشوف حلاة بنوت

نضار بنوت ,حلاتن فاتت السكر

وجوهن زي ملاك رحمة

وعيونن جل من صور

وديسن زي سواد الليل

بشيل شبالو زول اغبر

مجرح ضهرو بالسيطان

وفوقو السوط دربو مجر

رقيصن زي جنا الوزين

وكتين في الدميرة دفر

غناهن قالو ود الدابي

والحاردلو بالدفتر

واسماعيل حسن يازول

قاليهن وكت سطر

حلاة ناسا طعم ناسا

بلا سكر

طعم قراصة في قدحا من الدبكر

كواريك شفع المغرب

يقلبو في الجمر قنقر

وعند ديل النعام آدم

ولايااخوي دوانا سمر

طمبور بي سلك معقود

ولاجيتار بألأف وتر

ولي واحد اكان بدري

اكان بي بلدو مابدري

اكان ود بادي قال بدري:

يادلوعة يامرنوعة

أعدل ايدك المفدوعة

واستعدل واقيف دغري

واس سدرك مع سدري

يعني يكون زي العسكر

ويعني يكون متل غيرو

يفاخر بالوطن ويفخر

تراهو دة بس ولد عازة

وآلاف متلو ماهو نفر

ودي شيمتنا بنعيش احباب

وصفانا صعب وكت نعكر

والدايرنا ألف حباب

والدايرنا ألف حباب

بس مايجينا يتكبر..