مصطفى سيد أحمد «كلمات الأغاني»

تقليص
هذا موضوع مثبت
X
X
 
  • تصفية - فلترة
  • الوقت
  • عرض
إلغاء تحديد الكل
مشاركات جديدة

  • #76

    آخر شعاع


    كلمات : مدنى يوسف النخلى

    الليلة مات آخر شعاع
    شفناه من نور الأمل
    وقفت فى نص الطريق
    و الليل خلاص سترو إنسدل
    و صفير رياح و عميق جراح
    و أشباح تقول لى ما بتصل
    كيف تصل وسط الضياع
    حتي الشعاع منك أفل
    كيفن تصل و الليل طويل
    و عليك تقيل زى الجبل
    و سحابة حجبت النجوم
    و كسى الظلام كل القبل
    فى اللحظة ديك شفت الضياع
    و اللوعة فى القدر النزل
    شعرت بى موج الوجع
    قلبى إنصرع دمعى إنبهل
    شفت الخيال لوح بعيد
    عبر الظلام ..
    صاح فى وجل و قال الضياع
    صاح فى وجل و قال الوداع
    كيف الوداع بعد الحصل
    وين الصباح الكنت فيهو
    أعيش من وجهك أطل

    *****

    تعليق


    • #77

      الدنيــــا ليــــل

      كلمات : عبد العال السيد

      الدنيا ليل … غربة و مطر
      و طرب حزين وجع تقاسيم الوتر
      شرب الزمن فرح السنين
      و الباقى هداهو السفر .. يا روح غناى
      الغربة ملت من شقاى و غربتى
      و بقيت براى حاضن أساى و وحدتى
      لا غنوة .. لا موال يبدد حسرتى
      غير الدموع يا ملهمة .. الغربة مرة و مؤلمة

      *****
      قولوا للنيل ضفة .. ضفة ..
      و العشيات لما تصفى .. و النسيمات البتآخذ
      من عفاف ريدتنا عفة
      إنو شوقى … يفيض بحر
      شوقى شوق إنسان مضيع ..
      ضيعوا الليل و السفر
      لا ينابيع ريدى جفت ..
      لا و لا أشواقى خفت
      كل يوم فى غربة زايدة..
      و بيها كل الدنيا عرفت
      الدنيا ليل غربة و مطر

      *****

      تعليق


      • #78

        وضاحــــــــــــــــــــــــــة

        كلمات : أزهرى محمد على

        الصباح الباهى لونك
        وضاحة يا فجر المشارق
        غابة الأبنوس عيونك
        يا بنية من خبز الفنادق

        *****

        شيدتى فى جواى صوامع للفرح
        و فتحتى فى دنياى مسارح للمرح
        و بقيتى لى سكة وعيون
        لا قدرت أطولك شان أجيك
        و لا قدرت من غيرك أكون
        و أنا بيكى مالينى الكلام

        *****

        حركت بيك عصب السكون
        جلبت ليك الغيم رحط
        طرزت ليك النيل زفاف
        و حرقت ليك الشوق بخور
        و فرشت ليك الريد لحاف

        *****

        لا السكة بيك بتنتهى …
        و لا معاك مليت طواف
        يا ريتنى لو أقدر أكونك
        وضاحة يا فجر المشارق
        الصباح الباهيى لونك
        يا بنية من خبز الفنادق
        غابة الأبنوس عيونك

        *****

        تعليق


        • #79

          سحابات الهموم

          كلمات : عمر الطيب الدوش

          سحابات الهموم يا ليل بكن
          بين السكات و القول
          و باقات النجوم الجن
          يعزن فى المطر …
          فاتن عزاك … رجعن
          و شوق رؤياك
          زمان مشدود
          على أكتاف خيول …
          هجعن
          و صوت ذكراك …
          مكان يجري … يلاقي السيل …
          وسر مدفون بصدر النيل
          ولو لا الذكري ما في أسف
          ولا كان التجني وقف
          وصوت ذكراك …
          رزاز صفق …
          علي خطوات بنات سجعن
          وشوق رؤياك …
          حنين لى رحلة فى المجهول
          لو لا الذكرى … ما فى وصول
          و لو لا الذكرى … ما فى أصول
          لو لا الذكرى … ما فى شجن

          *****

          تعليق


          • #80

            هردت لهاتى بالغنوات

            كلمات : محمد الحسن سالم حميد

            سنى على النضال إيدىّ
            سَوّكى بالهتاف فَمّى
            شوارعك لّىْ دويها علىّ
            إذا ما آخر العلاج الكىّ
            مراويدك حُمُر حُمِى
            هردت لهاتى بالغنوات
            وقت يبرد حشاك يمى
            من التعب البلا صالح
            تفيقى تروقى تنجمى
            تسوى مكانسك المطرة
            تضوى البيت و تنحمى
            تمرقى صبوحة للجيران
            قدح فوق إيد و فى إيد المى
            يلاقوك شفع الكُتاب
            نضاف و ظراف بلا النسْمِى
            بغنولك غناوى الساب
            و فى بيوضة ما فى سراب
            جبال كجبى و فيافى الكاب
            تميد بالخضرة منقسمى
            فيافى الصى و بيوضة
            خدارا يرارى شوف عينى
            على الأبواب
            قماريها … طواريها
            و حواريها بقت روضة
            بقت تشرب من الحامداب
            تشوفى رهاب بعد نجمى
            أشوف العالم التحتانى
            هيلاهوب وقف ناهض
            هدّ عمائد الفوقانى
            جوه الجُب رمى العارض
            و فى السابو الدمار أفراق
            وعِريق الحب نبض قابض
            مثل قبض الحروف فى إسمى
            و غناوينا القبيل رقراق
            علينا تصب برد قارص
            و أجر نمى وأدودى لهاتى بالغنوات
            عقب يبرد حشاك يمِى
            وطني ولا مَلِي بطني
            سُكاتى و لا الكلام النىّ
            بليلتى و لا ضابيح طىّ
            قليلتى و لا كُتر سِمّى
            سلام يمى
            سلام لا هكمى لا دكمى

            *****

            تعليق


            • #81

              نـــــــــــــــورا


              كلمات : محمد الحسن سالم حميد

              وكتين يضيع عرق الجباه الشم
              شمار فى مرقة … آه يا نورا آه
              من دربك التور نفس خيل الصبر فتر
              خطاوى الشوق وراك … آه يا نورا آه
              ساعة الشموس الغر تهضلم
              تلحق الصح فى المغارب
              يستر الضو الكهارب
              تستر المدن الضبابية السرابية … الكآبة
              حائط التيه والطشاشات فوق كفيف
              يا أم عوارض مو دعاشة ماها شبورة وتقيف
              جاي ليك يا نورة غيمة
              تملأ ماعونك خريف … يملأ عينيك ويفضل
              ويروي جواك العطاشا … مو دعاشه …
              جاي ليك يا نوره غيما تملأ ما عونك خريف
              يا نفس فجر القصائد … يا بلادى
              القطع قلب الروادى باللواج الجاى وغادى
              دا ماهو صوتك … لاها صورتك
              دى البترقش نادى فوق صدر الجرايد
              إنتى يا حزن الصحارى … شفع العرب الفتارى
              البفنوا الشيلاه ايديهم و يجروا كايسين القطارى
              لا سراب الصحراء موية لا حجار سلوم موائد
              حالكم البصرخ ينادى … يا وطن عز الشدائد
              يا هدي الناس الحيارى
              يا ندى الفجر الببلل نور عيونات الفقارى
              جاي ليك يا نوره آفه ..
              آفة للسوس البينقر عود عشيماً داخرو فيك
              أصلي لمن أدور أجيك … بجيك
              لا بتعجزنى المسافة … لا بقيف بيناتنا عارض
              لا الظروف تمسك بايدى … و لا من الأيام مخافة
              يانفس فجر القصائد … ما ضهب فى بعدى عنك
              أصلى متغرب عشانك راضى … بالجاينى منك
              ما شكيت شح الليالى … ما بكيت نح شلتو حالى
              رغم انو الحال بيفضح … إلا كت فى الحاره بصرخ
              يا وطن عز الشدايد … يا وطن عز الشدايد

              *****

              تعليق


              • #82
                الخلاص

                كلمات : محمد الحسن سالم حميد

                ما طال ما بحرك فى مي
                وتمرك مفدع بالجريد
                شدرك امد حد السمي
                طينك معتق بالطمي
                نبنيك أكيد … نبنيك هوا
                نبنيك ايو … سوا … سوا
                منو وجديد نبنيك جديد
                يا أيد أبوي علي … أيد اخوي
                علي أيدي أنا …
                علي أيد .. وأيد تجدع بعيد
                فى اللجة من رأس مdضنة
                حيكومة الفقر الدمار
                الكضبن والصهينة
                واللي نقاص أيامنا ساس
                اليا لطيف سوس البحر
                نرجم قفاهو حجر … حجر
                ما ها الرصيف
                الما قدر قدام
                سريحة الموج يقيف
                الما انستر
                الأرزقية وناس مو يا
                نسقيها كأس اسقتنا يا
                نوريها كيف عشق الحياة
                سنانا فوق حجر القصاص
                سوانا ناس ضرب البحر
                جوانا احرمن الرصاص
                يا ضو حبيبن القسا
                طول ما انت غرقان فى الأسي
                تبت يديك ما ترمي ساس
                ما تبني مجدك من جديد
                تفتح نسيمات النشيد
                بيت القصيد يستقبلا مستقبلا
                والحاضر الماضي التليد
                يا بلدي يا فرده جناحي الثاني
                وكت الناس تطير لي عالما
                واوجعة الزول البجيك
                ما يلقي فيك غير الهجير
                ناساً ثواني مسالمة
                كل البشاشات القبيل يلقاها ميتة مسممه
                والجاتا جاتا من الأرض
                ما جاتا من تالا السما
                ما اعني غبتك يا ولد
                وأعدل قضيتك وأعظما
                لا ترجع السيف الجفير
                والدنيا فايزة مصادمة
                من غير تجيب دار البلد
                ريح العوارض تهزما
                وتطرد مع إبليس الأخير
                دعة الضلال من جنتك يا آدما
                تأكل من الشدر الحلال
                يغشاك نعاس فى ضل رمي
                تختاك هضاريب الصعب
                كربة ليالي المظلمة
                يا نيل قبل خاطرك يطيب
                ارضك تفزع باللهيب
                تكشح تواريب الغضب
                صعب المراس
                نوبة وزنوج وبجة وحلب
                رطانة عربان مواشو
                مولدين تلقانا أو…نلقاك ضو
                ضلمة لياليك العجاف
                رشة نهاراتنا النشاف
                آمنا بيك وموحدين
                فى إيدنا فاس وقلم رصاص
                شتلة وكمنجة ومسطرين
                وطبنجة فى خط التماس..حراسة من يكد البكيد
                ضد الرصاص والانتكاس
                نبنيك جديد وأشد باس

                *****

                تعليق


                • #83
                  بت العرب النوبية (نوراى)

                  كلمات : محمد الحسن سالم حميد

                  الشوق من حاصف لا قاصف
                  اتلم يهز ليك يا نوراي
                  يا درقة وسيف
                  يا حصنا كيف
                  من شر الصيف والشتا ضاراي
                  يا شعلة عز بقت جواي
                  عدت بي ضلام بحراً عاصف
                  يابت العرب النوبية
                  يا بت النوبة العربية
                  بي شملة نخوة بجاوية
                  او شجر الصحوة الزنجية
                  دسني من الزمن الفارغ
                  من ريح المتعة الوقتية
                  من شر الساحق والماحق
                  بين ريش المدن المدعية
                  والليل اتحكر بيناتنا
                  كحل بي ريشو عويناتنا
                  يا شمس الناس المسبية
                  الجوع .. العطش … الغد الواحد
                  الفقر الضارب زي سوسه
                  الخوف والحالة المنحوسة
                  يا بحر الحاصل لان ناشف
                  لا قلمي الفي يدي عصا موسي
                  الناس عوجات تحرس ترجي
                  ترجعبو سلاح وانوار زينة
                  بنيات تواليت رفات وسكي
                  للناس الدمنا بنزينها
                  يا بت الناس الصالحين
                  الذمم المشربه الطالحة
                  شتات بين دينك وبين دينها
                  يا نورة شليلك ما فات
                  بي عدلو شليلك جاييك
                  القمر الطيب بفضحني
                  تنجني سجونك واهاتها
                  كجنا سجونك لولاك
                  منعول الزمن الخلاك
                  سمت الوطن الهمباته
                  علي كيفك كيفك بتحكم
                  يا سوس تكنك ما بتعلم
                  بي حال البتألم ساكت
                  يا حال الساكت وبتألم
                  بتقتف جرحك يوم تبرا
                  تتلم وقيدك يتحطم
                  وين عادك هارب من بكره
                  وخطو التاريخ البتقدم
                  رغماً من عنت الايام
                  والزمن الجهجاه الفاجع
                  بي النفس النازل والطالع
                  لا واحد من شعبي مضارع
                  سميت ومشيت وما متراجع
                  ترتالا ها تكسولها فى الجية

                  تعليق


                  • #84
                    ليه غبتى ياالقمرا

                    كلمات : قاسم أبوزيد

                    ليه غبتي يا القمرا
                    نركب جياد الليل
                    ينشر بينا صباح
                    سفر العتامير ليل
                    برجاك في المطرة
                    أرجع تعال يا شليل
                    درع الاميره سرق
                    سو وهو حدوة خيل
                    بحر العطاشا نشف
                    نشوب بواقي السيل
                    صد لي ملامحك يا حراز
                    ريح العوارض غربت
                    فرتق ضفايرك بالزاز
                    جية العصافير قربت

                    تعليق


                    • #85

                      علمى عيونى السفر

                      كلمات : مدنى يوسف النخلى

                      علمى عيونى السفر
                      ما البسافر فى عيونك
                      سكتو بتبقى السلامة
                      ينسى أحزانو .
                      ويعرف الدنيا جنبك إبتسامة
                      ظللى الناس بى حنانك
                      أبقى ليهم ضل غمامة
                      *********
                      الشقا اللاّزمنى .. مدة
                      يوم بفوت .. والفرحة تبدا
                      ما بقول .. فارقنى عدّى
                      عشان بخاف ترحل عيونك
                      وتنهزم فينى الأمانى
                      وبى شقاهو .. وبى أساهو
                      تانى يتوشـّح زمانى
                      أصلو غير عينيك .. وحاتك
                      مافى للأفراح .. معانى
                      ********
                      جينا ليك شوق فى عيونـّا
                      وفى عيونك شوق يناغِم
                      الشجون باكر بترحل
                      والزمن يصفا .. ويسالم
                      والحلم يصبح حقيقة
                      وتنسجم فى الحب ظروفو
                      والحنين تزهر غصونو
                      والعشم .. دانيات قطوفو
                      شوفى كيف يوم بكرة .. عامِر
                      هاتى إيدك .. شان نطوفو

                      تعليق

                      يعمل...
                      X