مصطفى سيد أحمد «كلمات الأغاني»

تقليص
هذا موضوع مثبت
X
X
 
  • تصفية - فلترة
  • الوقت
  • عرض
إلغاء تحديد الكل
مشاركات جديدة

  • #61

    صــابرين

    كلمات : محمد طه القدال

    صـابرين .. صـابرين
    يا حزن الغنا من بعد الضنا
    علي وعد المنى
    برجاك يا وكت الحبيبة
    و بلقاك فى الفرحة القريبة
    و بشراك يا أم الثناء

    ****

    لا ليل و لا حزن طائل
    لا صد و لا دمع سايل
    لا هم جاك يا أم نفايل
    و النيل فاض و إنحنى
    نيلين و حلمك أنا
    فرعين شايلين جنا

    ****

    عشرات حبابك .. سلامات
    يسلـم شبابك .. سلامات
    شايـل سحابك .. سلامات
    و القبلـى شابك .. سلامات
    خيرك سنابل .. وهواك هنا
    قلبين عاشقين ترابك .. سلامات
    حزنين .. من حزن الغنا
    صابرين ..

    ****

    تعليق


    • #62

      حبالنا الجوّة

      حبالنا الجوة .. ما تخنت
      حبال السما الممدود
      حبال الصوت وكت يرجع
      يجيب الخاطر المردود

      *********

      تعالى نشوف
      غنواتنا البقت فى الدنيا ما بتشوف
      تعالى نشوف
      حروف البكا .. الجوّاها مافى حروف
      تعالى نشوف .. تعالى نطوف
      على المدن البِقت أشباح
      على الجوع القعد مرتاح
      على الكلمة البِقت فى الجوف
      تفتش سكة الأفراح

      **********

      تعالى نشوف
      منو البقدر يخاصم طفلة
      صِبحت هازلة فوق مدّ الأسى .. الحرّاق
      يا غنوتنا ما تفوتى
      ويا كلمتنا ما تموتى
      فتشى فوق ضمير الكلمة
      عن وتراً رحل ... فرّاق
      وعن ولداً رحل ... فرّاق
      وعن بلداً رحل ... فرّاق
      وعن عِلماً رحل ... فرّاق
      غُنانا الفينا ما بشفع
      حديثنا الجوّة ما بِنفع
      تعالى نشوف .. تعالى نطوف
      تعالى ..
      نعلم الشُفّع

      تعليق


      • #63

        من جديد

        كلمات : مدنى يوسف النخلى

        من جديد جيت تانى تكسر صمتى .. بالنظرة الخجولة
        يا أمل عمرى القبيل .. ويا سنين عامرات .. فصولا
        ما قدرت أنساك من زمان
        بس ضاعت أحلام الطفولة

        ********

        الحنين الجيتنى بيهو
        جانى فى لحظات ندم
        ما زمان ضيع صبانا
        وكل لحظات العشم
        من جديد جيت تانى ليه .. تبنى فينى الإنهدم
        وما قدرت أنساك من زمان
        بس ضاعت أحلام الطفولة

        *********

        ما بفيد لو ألملم من عيونك .. ذكريات
        أو أصحى الماضى فيهن
        وأنسى حزن الأمسيات
        برضو زمن البهجة عدّى
        وعمرى فات فيهو الفوات

        تعليق


        • #64

          سِفر السكوت

          كلمات : فيصل محمد صالح

          طوبى للرجال العصافير
          كلما حطّ طائرهم فوق غصن
          غنوا بشجيى الكلام .. بديع الصور
          وبؤساً لنا نحن الرجال .. الشجر
          تهاوت جذور الكلام
          جفت ينابيعنا
          وأرهقتنا ليالى السفر
          تؤرقنا الذكرى
          توقِد نار المواجد فينا
          فيوجعنا الشوق فى صرة القلب
          يتأبى حتى السكون الذليل
          نخرج الآن من جلدنا
          ونخدش صمت السؤالات
          نركض عبر الطريق الطويل
          من أى ثقبٍ فى الحكايات جئنا
          ومن أى بابٍ فى السماواتِ .. كان إلتماس السكينة؟
          ومن أى ذنبٍ عصىٍ
          تعلم القلب سفر الرحيل
          الطيور قطعت رحلتها ثم عادت
          والأمانى إستكانت
          والليالى ما عاد صمتها مستحيل
          والنساء اللائى علمننا
          العشق فى زمانات النداء الجميل
          نسجن كعادتهن من كذوب الروايات
          ما يخلع الدفء عن جسد الحب
          ثم تذوقن للحبيب البديل
          يا صديق المسافات أركض
          ما عاد فى الحزن متسع
          لصفير الجراحات ــ قلبى وقلبك ــ
          ولا صبر فى الأفق لإنتظار الخيول
          كل المراكب تاهت
          أنكرتنا الشموس
          والحبيبات خانت
          لفظتنا البحار
          فهل يستطيع البنفسج أن يكون الكفيل ؟
          أيوجعك الوصف ؟
          آه .. من زمنٍ كنا ننتقى فيه العبارات
          من فصوص المحار
          نتمشى فى مفاصل الشعر
          تأخذنا كل ساعةٍ فى مدار
          آه .. من آه .. ثم آه
          من كل ذاك الزمان النبيل
          أصرخ الآن .. أو
          أخرج الآن .. أو
          إنزف الآن .. أو
          أكتم الشدو فى الفؤاد العليل

          تعليق


          • #65

            شـــهيق

            كلمات : عاطف خيرى

            نكر صوتك صداك
            غالطنى الزمن فيك
            شهرت على الجفاف وعدك
            بطاقاتنا الخريفية
            رجع فاضى الكلام مليان
            معاك إتبرجت غيمة
            وشهق جوايا صوت جدول
            مرقت على المطر .. حفيان
            لقيتك والرزاز .. مدخل
            وناديتك :
            أقيفى معاى
            نشيل كتف الغنا .. الميّل
            ونتخيل
            حلم دونك بيتحقق
            وقبلك خيل دماى .. واقفة على شريانى .. تتشهق
            وبرق صوتك .. صداك .. غنيتى
            رشحت حلقك لى إذاعات الشجر
            والمنتظر من عودة المدعو المطر
            وللطنابير .... و المسادير
            واللسة فى رحم القصيد
            والدابو حسّ فى سوق عكاظ
            بين مزادات الحروف
            غيبت رسمك .. وإحتكرتك لى الظروف
            للزمان الجايى .. واللحظة اللى فاتت
            .. منى هسة
            .........
            يا واقفة بين جرح السحاب
            وبين شهقة الأرض البكر
            ما كان ده ريد
            كان إحتمال تغيير قوانين حركتك
            ما بين حديثنا .. ولحظة الفعل الحقيقى
            وإنتباهك إنتى للشارع البيرجع تانى .. لى نقطة بدايتو
            وإنحيازك إنتى للشارع البيرشح
            فى مسام رمل التوقع
            وما أتعرف قانون نهايتو
            غايتو أمشى فى الدرب البطابق فيهو خطوك .. صوت حوافرك
            يا فرس كل القبيلة .. تلجموا
            يكسر قناعاتا ويفر .. يسكن مع البدو .. فى الخلا
            ما يرضى غير الريح تجادلو
            .. وتقنعوا
            ........
            إفترضتك لون أساسى
            يمنح اللوحة إزدواجية القراية
            ويفتح الضو
            بين خطوط الريشة ..
            والخط الإضافى .. الجايى من شبكية الزول البشاهد
            وإكتشفنا الرسمك وأنا و برضو التوارد فى الخواطر
            نفس أرقام التذاكر
            البيها سافرنا وشهدنا
            إنفجارك فى الأرض
            يا سمرا يا واضحة
            ما غنيت يوم جيتك .. صدفة
            قبل أبداك كان غصنك .. بشـّر
            يوم ما كان إحساسك مسّ
            عرج غيمك فينى .. ومطّر
            لحظة طار عصفور من صدرك
            رتب فينا إحساس بالإلفة .. ودوزن عصب الزمن الأشتر
            وإتوكلت عليكى .. وقلت
            المارق منك داخل جرح الوردة وراسم فوقا غناوى الطل
            المارق منك
            رجع للغابات العرب العاربة
            وللعتمور الزنج الهاربة
            وأدى الكون مفتاح الحل
            المارق منك
            شادد عصب الورقة .. وحرفى
            وراصد فى اللاّ وعى سكون
            مواعيد صحوه .. وحلمو ولونو
            شارى يقينك فى ظنى
            سارق لحظة إنى أفكر
            المارق منك
            مارق منك .. أو ..
            مُتّى ! شهيق ....

            ما تتضارى ورا الدعوات
            وما تتلبسى فرح الفات
            بسكن فيك النغم الزايف
            ويسرق حاسة شوفنا الواقفة على رجلين جوانا
            نحن الهاوية .. والمتطامن من الأرض
            آه من نحلك ساعة يرحل
            ولمن يكتب فينا الحنضل
            ويختم عمرو بفعل الشهد

            قال الجدول :
            طلوع النخلة .. مرور الريح .. واحد
            لكن الريح بعانق حقل
            ونحن بنطلع نخلة .. وننزل
            ونكتب فى ذاكرة الصفق الأخضر
            سجنا الريح فى الورق الأبيض
            وجهناها ضد التمر الناعس
            يسقط زى قبعة الحارس
            زى الكان بيناتنا .. و فات

            قالت غيمة :
            ".. بين قوسين غيمة لئيمة"
            أولاد الشارع فهرس لى كل المدن
            التهرس جوفك بالأسمنت
            قالت ريح :
            شوف الناس قنديل
            لو ما نور يحرق كوخ .. وباقى الحلة تنور
            أو جبة جوخ .. أو ينزل بوخ
            يقول للنسمة الزايفة .. أقيفى
            لو تتفرد ريح .. تتشرد ريح .. ريح الخوف
            لو تتفرد ريح تبدا تفرتق ضفاير المدن الكاذبة
            تعيد تسريحتك

            ويوم سمايتك .. شكل قامتك
            كيف تموتى .. وتحيى تانى
            ويوم قيامتك .. هو البيدينا الثبات
            يا مجلوبة فى قافلة رق
            ما بستحمل صدرك رصاصة ظلم
            يا صابت رحم الفال
            يا قطعت حبل الحلم
            يا كنا نبيعك .. يا نسرق
            إخترنا النار .. الضلها يحرق
            طمنـّاك إنو الدنيا بخشها ضو
            يجرح جلد العتمة
            لما الليل قربان فجرك
            يا بت يا نيل
            لو نامت قمحة على الأبيض .. تتشرد زيو
            وزاد الأبيض فى غيو
            ومدد رجلو اليسرى
            ما كان الكسرة .. جاتك من برة
            صفرا .. ومنكسرة
            زوجناك الشهداء وِلاد الكلب
            الماتو عشان الشعب
            زوجناك ما جاتك ضرة
            زوجناك ما عندك ضرة
            وما إنشاف ماعونك فى الحلة يساسق
            ويلقى فتات
            قال الأبيض لى الأزرق:
            يبقى ضد الإنتباه
            وضد تواريخ التمازج بينى .. بينك
            البشوفك فى مراهقة الخرائط
            وفينا من وجع المسافرين .. واطه .. ما لاقت هوية
            رد الأزرق:
            مطر الحبش لو كان نبش جواك سقف
            و هد حيلك فى الدواخل
            وشدّ عصبك فى المداخل
            صوت مراكبى
            وإيد بتسأل فى القمح
            وفينا من فرح المسافرين قصة الشمس .. القضية
            يا أعشاب النيل الأبيض .. ما تتضارى ورا الدعوات
            أقرا تاريخك .. وأخاف
            أقرأ تاريخى ... و أخاف
            أسأل جبين الفجر .. ألقى الفجر مطعون فى القفا
            هل سافرت فى دمك المحقون رجا
            حبة غضب
            ما شلنا جمرك .. وإنطفا جوانا نارك .. والمطر
            جايين بالكتابة .. وضربة الناس المهابة
            لو هز نخلك باشبزق
            ما فارق التمرة السبيط
            وما ساور الطورية شك
            إنو الأرض أنثى .. وبتحمل بالحلال
            مين اللى قال
            إنو المسافة البينا بين الشمس طاقة
            أو مياه النيل
            بتدخل فى عروق السنبلة المسقية بى عرق الجعانين ..
            والمساهرين بالبطاقة
            أقرأ تاريخك .. وأقيف
            أقرأ تاريخى .. و أقيف
            جواكى .. والزمن النضيف
            جواى .. من جواك غضب
            سلم مفاتيح السؤال
            جيل الشمس .. موكب حريق
            واقف على باب الدخول
            بيناتو بينات الوصول ..
            لحظة شهيق

            تعليق


            • #66

              طــيبة

              كلمات : محمد الحسن سالم حميد

              كل ما تباعد بيننا عوارض ..
              كل ما هواك يا طيبة مكني
              تلد الغربة القرب الواحد ..
              بيك أسمي الشوق وأكنّي
              و بيك أسمى شعوب و أكنى
              لما أفوتك من دون خاطر ..
              أو دون خاطر مني تفوتي
              بلقى حبايب في كل حتة ..
              وكل بيوت الفقراء بيوتي
              لا غيرت وراك الجتة ..
              لا بدلـت ملامح صوتى
              لا غافلنى وهادن فنى ..
              غامل المدن الما عرفتنى
              تبن الشوق الصبرو مصوبر ..
              للأرياف الكم وفتنى
              وللأطفال الناشفة ضلوعها ..
              ونازفة بغنى
              أطّمن روعها واهدّى دموعها ..
              ببسمة بكرة الماها تمنى
              ولا مصنوعة
              أغنى لشعبى ومين يمنعنى ..
              أغنى لقلبى إذا لوعنى
              مخير دربى اللي ما رجعنى ..
              إذا طلعنى نخلة القرب
              بلقى الغربة الكدرومية ..
              و تنزل غنوتى بقمرية
              أو وقعنى في بطن الجب ..
              يطلع يوسف بالأغنية
              أغنى الناس الما بتسمعنى ..
              المنى بعيده المبعد عنى
              حلاتا نشيدها وكنت المعنى ..
              الإيدى في إيدها..
              وإيدها بتبنى
              في دنيا جديده
              اليوم راح تدنى ..
              واريت غنواتى في ناس شغالة ..
              تكون سندالة
              وعود طورية ..
              ضراع رجالة ..
              كتاب أطفالها ..
              وجملة بالها الما مكرية
              سدة مالها وبقة فالها ..
              في ليلة الدخلة على أسمى قضية
              حبيبة قلبى يا سودانية ..
              يا أسمى معاني في زول بيعاني
              يا ود ضكران يا بت دغرية ..
              وأنا إن سامعانى فضلت
              أغانى غبش فقرية وروح حاميانى ..
              هويتك منك يا دافعانى
              ..براحة إيدي كما الأشواق
              ويا جابدانى برفق على
              وما بتحير بين الفوق ..
              وبين الناس التحتانية
              إلا مغير ولا عقوق ..
              ولا كفيف الإنسانية ..
              ومنك وين يا كاشفة عيني ..
              بنور الإلفة ضياء الحنية
              وحلم العالم ناس تتسالم ..
              والبني آدم صافي النية
              للأطفال الناشفة ضلوعها ..
              بطمن روعها وتبدا تغنى
              غناوى البكرة الكم مسموعة ..
              حسيس طنبارة مع نقارة
              صفقة حارة ودارة تغنى ..
              فيا حلتنا عليك ترابك
              وأنت شبابك زينة الجنة ..
              أحلى عروس البلد اللتنا
              ولا الغبش الرابة تهني ..
              ولا هدير المدن التصحا
              وتمحى ظلام الحاصل عنى

              تعليق


              • #67

                باكــــر ضـــواى

                متخبية والناس شايفنك
                باباى ونخيل
                متخفية والناس عارفنك
                قرآن وإنجيل
                وشقانا معاكى .. هو إنـّك
                طاويك الليل
                لكن واردنك .. وراويانا
                لا عيون تحزن .. لا دموع بتسيل

                *********

                يوم بكرة جميل
                ضوّاى .. ووسيم
                يوم بكرة جميل
                باكر .. دافـِر
                يوم بكرة جميل
                أبداً لا أتغرّب .. لا مسافر
                باكر ضوّاى
                وجميلتو الليل الما سوّاى
                كان حاول يطمس أقمارو
                يوم بكرة جميل
                أبيض ريحو
                من فالو النيل يطمح طوفان
                وتخاف من موجو تماسيحو
                باكر ضوّاى
                كلمات وأناشيد .. وقيامة
                باكر ضوّاى
                وغناهو الحادى .. الهدّاى
                يوم بكرة جميل

                *****

                تعليق


                • #68

                  فى عــيونك

                  كلمات : أبو ذر الغفارى

                  فى عيونك
                  ضجة الشوق و الهواجس
                  ريحة الموج البنحلم
                  فوقو بى جية النوارس

                  *****

                  يا ما شان زفة خريفك
                  كل عاشق أدّى فرضو
                  ما فى شمساً طاعمة طلّت
                  إلا تضحكى ليها برضو
                  و الغمام الفيك راحل
                  فى الصنوبر يلقى أرضه
                  و الصباح إمتد ياما
                  كل ما جاوبتى نبضو

                  *****

                  نشتهيك
                  ياما نحلم نحكى ليك
                  عن المسافة و نشتهيك
                  عن سفن بالشوق بترسم
                  فى بحيراتك ضفافا
                  عن ملامح غنوة طلت
                  فى عويناتك هتافا
                  عن حقيقة نهاتى بيها
                  فى أساطير الخُرافة

                  *****

                  يا صباحات الموانئ
                  حتى لو دربك ترنح
                  فى مشاوير الأغانى
                  و الجرح إرتدّ بينا
                  لى زمان الآهة تانى
                  يانا لا بنتحاشى صدّك
                  لا بتموت فينا الأغانى

                  *****

                  يا غنانا المشتهنو
                  يانى موعود بى زمانك
                  بى مواقيتو البرنّو
                  بى إرتعاش صرخة وجودك
                  يوم يطلّ ميلادى منّو
                  لما إتوسّد صباحك
                  ياتو ليل يفصلنى عنّو

                  *****

                  تعليق


                  • #69


                    يا ضُلنا

                    كلمات : يحيى فضل الله

                    يا ضلنا المرسوم على رمل المسافة
                    و شاكى من طول الطريق
                    قول لى البنية الخايفة من نار الحروف
                    تحرق بويتات الفريق
                    قول ليها ما تتخوفى
                    دى النسمة بتجيب الأمل
                    و الأمل بصبح رفيق
                    و الأصلو في الجوف إندفن
                    لآ بتنسى ... لا بنمحى
                    لا بنتهى منو الحريق

                    *****

                    و الفينا من آهات أليمة
                    في حكاوينا القديمة
                    لا بيرحل عن عيونا
                    لا بتغشاهو الهزيمة
                    و القبيل راجنو نحن
                    يوم تبشر بيهو غيمة
                    لما تمطر يوم علينا
                    الفرح يملا المدينة
                    و البلودات الحزينة

                    ****

                    تعليق


                    • #70

                      لو كنتى معايا

                      كلمات : محمد المهدى عبد الوهاب

                      ما بين زمناً متمنيهو
                      زمناً منك زادنى أسيّة
                      طفت الدنيا عشان أنساك
                      و أنسى الحزن الطارد لىّ
                      و كان البحر الما خلانى
                      أعيش برانى
                      كان أخوان في الإنسانية
                      قعدت معاهم و إتفاكرنا
                      كم لفينا و كم ساهرنا
                      كم مازحنا ليالى الصيف
                      و كم غنينا للحرية
                      كم دارينا الحزن الأكبر
                      بين الصيف و جمال المنظر

                      *****

                      كنتى بتطلعى من عينيهم
                      وكتين يفرحوا أو يندهشوا
                      أو يفترشوا سواعد بعض
                      أو يتكلموا عن الأرض و سلام العالم
                      كنت غريب الوجه معذب
                      كنت براى و جانى
                      حنين الكون إتكوم
                      غور .. غور .. جوة في صدرى
                      و إتمنيت لو كنتى معايا

                      *****

                      ما أحلاهم شالوا معاى الهم بالجملة
                      و هتفوا البحر ... البحر
                      جوة المركب فضلوا يغنوا
                      شوية شوية و سكت المركب
                      كل الناس إتنين ... إتنين
                      و الفرح إتكلم بى لغتين

                      ****

                      تعليق


                      • #71

                        حاجـــــــة فيــــك

                        كلمات : هاشم صديق

                        حاجة فيك تقطع نفس خيل القصائد
                        تشده أجراس المعابد
                        توهتني … جننتني … جننت حرف الكلام
                        و برضو أدتني السلام

                        *****

                        حاجة فى شرف المدائن
                        وفى غرف كل السفاين
                        جوه فى عمق المناجم … وفى العيون
                        حاجة زي ما تكون محلق فى العواصف
                        وفجأة تهبط فى السكون
                        حاجة زي نقر الأصابع لما ترتاح للموسيقي
                        حاجة زي أخبار تناغم من جريدة
                        حاجة زي وتر المواني لما يصدح لى سفينة

                        *****

                        حاجة فيك لا بتبتدي لا بتنهي
                        خلتني أرجع للقلم و أتحدي بالحرف الألم
                        و أضحك مع الزمن العريض
                        و أنسف متاريس الطريق
                        و أعرف متين أبقي المطر
                        و أفهم متين أصبح حريق

                        *****

                        تعليق


                        • #72

                          سمحة و سمرية

                          كلمات : محمد طه القدال

                          سمحة و سمرية محبوبتى
                          و لفتاتا غزالة
                          خضرة و مسقية جنب
                          النيل مشتولة النالة
                          بهواك يا بنية كتبتو قصيد
                          و بقوله مقالة
                          بتفتحى في معانى غناى
                          تديلا مجالها
                          زهرة و برية بى شوق
                          الأرض عيونا كحالة
                          تريانة ندية بى عرق
                          الناس و الناس في بالها
                          يا خوفها على عقل و ثبات
                          ماها الولوالة
                          من فرحى البى قلعت الخوف
                          و كستنى بسالة
                          قت ليها النية متين نتلم
                          و الحالة بطالة
                          قالت لى غنية و إنت معاى
                          مستورة حالة
                          بت سودانية و محبوبتى
                          و لفتاتا غزالة

                          تعليق


                          • #73

                            المــزار

                            كلمات : عبد العال السيد

                            من بعد ما عز المزار
                            و الليل سهى و ملت نجومو الإنتظار
                            و الشوق شرب حزن المواويل
                            و إنجرح خاطر النهار

                            *****

                            و بقيت أعاين فى الوجوه
                            و أسأل عليك وسط الزحام قبال اتوه
                            يمكن ألاقى البشبهك …
                            ما الليل براح و الشوق تعالى بيندهك

                            *****
                            شايلاه وين النيل معاك
                            عصفورة جنحاتها النجوم و أنا بى وراك
                            بسأل عليك مدن … مدن
                            بسأل عليك فى المنفى … فى مرفأ السفن
                            إمكن طيوفك أخريات الليل تمر
                            تملأ البراحات للحزين طول العمر

                            *****

                            ما نحن بينا الأمنيات و التضحية
                            بينا المعزات و العذابات فى الحياة
                            بينا الهوي و إخلاص على قلب إنكوى
                            و كلام كتير قلناه آخر الليل سوا
                            انو راح نتلاقى لو طال النوى
                            لكن كلامنا الكان … وكان
                            خائف يكون شالو الهوا

                            *****

                            تعليق


                            • #74

                              أبداكى من وين

                              كلمات : أزهرى محمد على

                              أبداكى من وين
                              و فينى منك لسه حاجات
                              من مخاوف و من شجن
                              و ظنى إنك فكرة إعلان الحياة
                              و إنتهاءات العوارض و المحن
                              نفسي ألقاك و أكون أنا كلى من بعضك
                              أو بعضى من كلك بدن
                              داير ألقاك و أوحد دائرة الدم
                              المقسمة بينى بينك و السحن
                              أبداك منى و لا منك أبتديك محل محل
                              من ياتو منفذ بدخلك
                              و كل المنافذ الفيك سداها الوحل
                              من ياتو شارع بوصلك
                              و كل الدروب معطونة لى آخر الوحل
                              بستبيح كل المنافذ و أدخلك
                              من كلامك بدخلك
                              من مسامك بدخلك
                              من أى قاسم مشترك
                              أو شبه التشابه بدخلك
                              و نتلاقى نهرين من تسامي و اشتها
                              و أبداك من حيث إنتهت عندك
                              خواتيم الانتهاء
                              أبداك و أخلع خيام عمرى المضى
                              و ألقاك مبسوطة اليدين
                              مفتوحة أبواب الرضا

                              *****

                              تعليق


                              • #75
                                مشرع الحلم الفسيح

                                كلمات : أزهرى محمد على

                                يا مشرع الحلم الفسيح
                                أنا بينى ما بينك جزر
                                نتلاقى و الموج اللديح
                                القدرة و الزاد الشحيح
                                كملتو ما كمل الصبر
                                نتلاقى فى الزمن المريح
                                ميعادنا فى وش الفجر

                                *****

                                يا مشرع الحلم الفسيح
                                يا بعض منى و فينى ساكن
                                أنا أصلى منك و مشتهيك
                                و بيناتنا ليل الغربة داكن
                                هبت هبوبك أفتح شبابيك المساكن
                                وسع دروبك نور مصابيح الأماكن

                                *****
                                يا مشرع الحلم الفسيح
                                يومنا النهب أسلبنا خوفنا
                                كبرنا قدرك مرتين طول قدر كتفك كتوفنا
                                يا رغبة الرعد البيسكن بين غناوينا و حروفنا
                                ضوى الدساكر و الضفاف
                                عبى الخناجر بالهتاف
                                سدد مسامات الرعاف
                                تنور مغاراتنا و كهوفنا

                                *****

                                يا مشرع الحلم الفسيح
                                أنا و إنت و المطر الفصيح
                                حنطوع الزمن القبيح
                                حدثني دايما كلما
                                تنشف على البر الضفادع
                                و يهجر الضو المواضع
                                و تسقط من الكف الأصابع
                                حدثني دايما كلما
                                تحرد مراسيك السفن
                                تسكن مرافيك الزعامات الدمى
                                حدثنى دايماً كلما …
                                حدثنى لو تاهت خطانا علي الدروب المبهمة
                                حدثنى لو صادف الكي المواجع
                                و ضلك علي الساحل رمى
                                حدثنى لو مطرك همى
                                علمنا دايماً كما
                                نبذر على أرضك شهيد
                                يطلع شمس يبهر بأنوارو السما

                                *****

                                تعليق

                                يعمل...
                                X