حليوة ليلة المولد
كلمات : محمد طه القدال
بقول غنوات .. وأقول غنوات
فى البلد البسير جنياتها لى قدام
وفى الولد البتل ضرعاتو فى العرضة
ويطير فى الدارة صقرية
ولو السمحة تلت إيد
ومدت جيد يقوم شايلاهو هاشمية
يشيل شبالو ختفة ريد
و ريدة روح و فرحة عيد
وحمرة عين وإيدية
و يا الولد البشيل مدقاقو قولة خير على القمرا
يقابل الجاية متحزم ويدارك الجاية متلزم
كلام فاسك على أرضك
بيبقى عديلة يا بيضا
و يبقى زفاف تزغرد ليه قمرية
****
و قبال حول تغيم غيمة قبلية
ترش الدارة والحدبة الصعيد الحلة
يا فرحة بتطارد الصفقة فى النسمة الصعيدية
ويا جهرة نهار الليلة بدرية
رحيح جنياتنا فى
الحدبة الصعيد الحلة
يا سمحاتنا هو لبلب
يا قمحاتنا هو لبلب
و يا اللوز الفتق فى الوادى هو لبلب
ويا البحر الطمح مدادى هو لبلب
ويا حجواتنا يا دعواتنا هو لبلب
سألتك بالذي ركز الأرض معبد
وسوى الناس عليها مقام
سألتك بى حجا الأمات ودمعاتنا
سألتك بى كبيداتن و دعواتنا
شليل وين راح
يكون طلّ الخريف فاتنا
وشليل وين راح
****
و زى برق السماك الجابها دغشية
و زى زغرودة البطن الكبارية
مرق من شامة القمرة
مهيقت بى وداعة الله و مقدم بالعديل يبرا
أبشروا تعالوا يا جنيات
شليل ما راح شليل ما فات
شليل عند المسورو حرق بقالو حصاد
شليل فوق التقانت قام خدار وبلاد
شليل مشوار شليل مسدار
شليلنا أرضنا يا جنيات
حرازنا شليل شليلنا دليب
شليلنا دليل على البلدات
بعد درب التبلدية
شليل قايم نصاصي الليل
يتمتم ليلو وردية
شليل ما راح شليل ما فات
مزارع بات على عشقين تراب بلدو
وسماح فوق بت مزارعية
أنا بقول غنوات ... بقول غنوات
****
تعليق