محمد وردي «كلمات الأغاني»

تقليص
هذا موضوع مثبت
X
X
 
  • تصفية - فلترة
  • الوقت
  • عرض
إلغاء تحديد الكل
مشاركات جديدة

  • #16
    اخى وصديقى سايمون مشكور على هذا المجهود الجبار لعرض بعض روائع الامبراطور لكن ارجو منك مدى بكلمات اغنية سافر بالسلامة ونحن متين سفرنا

    تعليق


    • #17
      كود:
      [font="simplified arabic"]هذه القصيدة الرائعة للرائع إسماعيل حسن
      و تغني بها الموسيقار محمد وردي...
      
      حلفتك يا قلبي
      حلفتك بربي
      خليهو الغرام
      إتنكر لحبك
      وريهو الخصام
      ليه تِتهان يا غالي
      ليه و الذُّل حرام
      ***
      تتعذب لوحدك
      ليل و الناس نيام
      إن جاك يوم يصالحك
      قول ليهو الكلام
      أوعى يعود حنينك
      و ترُد السلام
      ***
      أوعى يا قلبي تنسى
      في لحظة الوصية
      أنا عارفك حِنَيِّن
      بِتشَمِّت عليّا
      ***
      حلفتك يا قلبي
      الخانك تخونو
      و الفايت غرامك
      أوعك يوم تصونو
      زي ما أبكى عيني
      سهِّر لي عيونو
      أوعى تقولي تاني
      ما بنعيش بدونو
      إيه في الحُب لقينا
      غير همو و شجونو
      ***
      حلفتك يا قلبي
      حملتك أمانة
      الخانت عهودك
      ما تبكي عشانها
      حلفتك تقول لي
      إيه آخرة بُكانا
      الدنيا الجميلة
      و الحُزن الحلال
      الطير في غصونو
      الساجعات في حنانها
      كُلَّ الناس تغني
      ليه نِحنا الهَم طَرانا
      يا قلبي ليه
      قول لي بأمانة
      ***
      أوعى يا قلبي تنسى
      في لحظة الوصية
      أنا عارفك حِنَيِّن
      بتشمِت عليّا... [/font]
      التعديل الأخير تم بواسطة ; 10-26-2010, 04:25 PM. سبب آخر: تنظيم النص

      تعليق


      • #18
        يا سلام يا سلام

        تعليق


        • #19
          نور العين

          [gdwl]نور العين
          قلبي الحابيك ما خان لياليك
          ما ناسي الماضي ماتقول ناسيك
          ما بدل حبو ابدا ماتنكر ليك
          لكن الأشواك والنار حواليك
          يانور العين
          يانور العين انت وينك وين

          في اللون الأسمر ذوبت شبابي
          وعشقت الجنة وفي الجنة عذابي
          صابر وبتألم ولمر دا شرابي
          ياحليل الراحو ياحليل احبابي
          يا نور العين
          يا نور العين انت وينك وين

          الشعر الناعم بي عطرو اسرني
          والوجه الناير بي نورو غمرني
          عيونو النعسانة برموش تجرحني
          خلتني متيم وين راحت مني
          يا نور العين
          يا نور العين انت وينك وين

          انا والنغام والعود في ايدي
          بحكيلو حكايتي ويعيد ترديدي
          واشكيلو همسة أوهبتو نشيدي
          ياما الأوتار تفضحني من ريدي
          يا نور العين
          يا نور العين انت وينك وين[/gdwl]

          تعليق


          • #20
            الحزن القديم
            كلمات عمر الطيب الدوش

            ولا الحزن القديم

            إنتِ
            ولا لون الفرح
            إنتِ
            ولا الشوق المشيتْ بيهو
            وغلبْنى أقيف
            وما بِنْتِ
            ولا التذكار ولا كُنْتِ
            بتطْلَعِى إنتِ من غابات
            ومن وديان...
            ومنى أنا..
            ومِن صحْيَة جروف النيل
            مع الموجَهْ الصباحيَّه
            ومن شهقَة زهور عطشانَهْ
            فوق أحزانهْا
            متْكَّيهْ
            بتَطْلَعى إنتِ من صوت طِفلَهْ
            وسط اللمَّهْ منْسيَّهْ
            تَجينى
            معاكْ يجينى زمن
            أمتِّع نفسى بالدهشَهْ
            طبول بتْدُق
            وساحات لى فرح نَوّر
            وجمّل للحُزن..ممْشى
            وتمشي معاي
            خُطانا الإلفَهْ والوحشَهْ
            وتمشى معاي... وتْرُوحى
            وتمشى معاي وسط روحى
            ولا البلْقاهو بِعْرِفنى
            ولا بعرِف معاكْ ..روحى

            تعليق


            • #21
              لقاء الثوار
              كلمات عبدالمنعم عبدالحي

              لقاء يوليو المجيد .. مايو الرُجولة
              وسبتمبر كَتَب أمجاد بُطولة
              لقاء عَزَّ الصُمُود, ضَمَّد جِراحنا
              مِن بَعدِ الصُمُود لا بُدَّ جولَة...

              مِن أعماقي مِن خاطري و ضميري
              مِن فَيض إنفعالاتي و شُعُوري
              مِن أجل المصير حَيَّيت لِقاهُم
              لقاء ناصِر
              لِقاء ياسِر
              وقَذَّافي ونِميري...

              لقاء النيل .. لقاء ليبيا الفتيَّة
              لقاء عربي المدى, قومي المُحَيَّا
              لقاء وَحدة شُعور .. وَحدة أماني
              تَرَك فيها الألم آثار قويَّة...

              لِقاء وَحدَة أمل .. وَحدَة سواعِد
              لِقاء بُركان عَرَب ثائر وراعِد
              لِقاء وَحدَة نِضال .. وَحدَة إرادَة
              لِقاء أمَّة عَرَب تاريخها واحِد...

              لِقاء حُريَّة بالدَّم كان وُصولَها
              وإشتراكية في الوجدان وُصولَها
              ونِحنا عَزَمنا جَولَتنا بنَجولها
              بُكرَة الوَحدة بِنتَمِّم حُصولَها...

              تعليق


              • #22
                سلامات
                سودان جديد
                وطني المنصور
                عوافي .. عوافي
                صباح الخير و النور
                مساء الخير و النور ..

                يا شال و عباية
                و كسكتة و توب دمور
                يا بِت نجفاية عالية شعور
                يا لوح و قراية
                وتر و طنبور
                يا عين بكّاية
                و ريد ممهور ..

                يا صوفي
                و سُنِّي
                و عِلماني
                يا شوق
                يا ذوق
                يا إنساني
                يا غُربة
                و كُربة
                و أهليّة
                يا بان
                يا جاولي
                و تقليّة
                يا غالي غلاوة خُرافيّة
                و مهجّن عربي و زنجيّة
                دينكاوي
                بجاولي
                و نوبيّة
                فوراوي
                و جعلي
                و شايقيّة
                يا سودانويّة
                يا صوت فناناً صحّاني
                طرّاني الماضي و نسّاني
                أشعار في السبحة الألفيّة
                و ترنيم في سِفر مسيحيّة
                سلامات .. سلامات
                سودان جديد
                وطني المنصور
                عوافي .. عوافي
                صباح الخير و النور
                مساء الخير و النور ..

                يا أول و آخِر حُب لينا
                يا شرح الحاصِل و الفينا
                لو شالَك هم زادَك مِحنة
                و نسيت صباحاتَك
                نحنَ
                سامِحنا
                سامِحنا
                سامِحنا ..

                تعليق


                • #23
                  سلَّم مفاتيح البلد
                  كلمات الشاعر محمد المكي إبراهيم

                  عليك الزحف مُتقدِّم
                  وليك الشعب مُتلَملِم و متحزِّم
                  يقول سلِّم
                  سلِّم
                  وما بتسلَم
                  رحمتَ متين عشان تُرحَم
                  سلِّم مفاتيح البلد
                  سلِّم عباياتنا و ملاحِفنا
                  مصاحِفنا و مسابحنا
                  جوامعنا و كنائسنا
                  سلِّم مفاتيح البلد ..
                  تُراث أجدادنا سلِّمنا
                  عقول أولادنا سلِّمنا
                  بنادِقنا البتضربنا
                  الموجهة لصدورنا
                  و برضو حقتنا
                  سلِّمنا ..
                  سلِّمنا الزمان الضاع
                  وليل الغُربة و الأوجاع
                  آلآمنا اللي عشناها
                  على الوطن العزيز الجاع ..
                  حتهرب وين

                  من الألم الكبير و الجوع
                  و من تعليمَك المدفوع
                  و من شعباً سقاك لبنو,
                  و سقيتو من الهوان و الجوع
                  من كاسات سمّكَ المنقوع ..
                  حتهرب وين
                  من الذكرى و عذاباتها
                  و من لبن الأمومة و من حساب الرّب
                  حتهرب وين و إنتّ إيدينَك الإتنين مُلوّثة دم
                  فصيح الدم
                  ينضُم و يتكلم
                  يقول سلِّم
                  سلِّم مفاتيح البلد ..

                  تعليق


                  • #24
                    لو لحظة من وسني
                    كلمات محمد الفيتوري

                    لو لحظة من وسني
                    تغسل عني حزني
                    تحملني
                    ترجعني
                    الى عيون وطني
                    يا وطني ..
                    يا وطني يا وطن الأحرار والصراع
                    الشمس في السماء كالشراع
                    تعانق الحقول والمراعي
                    واوجه العمال والزراع
                    يا وطني ..
                    أصبح الصبح كأن الزمن الماضي على الماء نقوش
                    فارفعي راية اكتوبر فالثورة مازالت تعيش
                    في قلوب و ايادي
                    وانا مازلت في البعد انادي
                    يا بلادي
                    يا مغاني وطني ..
                    أجمل من فراشة مجنحة على ضفاف المقرن الجميل
                    أجمل من نوّارة مفتحة ترقد تحت ذهب الأصيل
                    أجمل من رائحة النضال لم أشم رائحة في صبحك الجليل
                    يا فخر هذا الجيل
                    يا وطني ..

                    تعليق


                    • #25
                      يا ثوار أكتوبر

                      يا ثوار أكتوبر يا صُنَّاع المَجد
                      للحُريَّة الغالية حَطَمناهُ القيد
                      هيَّا .. هَيَّا
                      هَيَّا حيُّوا الثورة
                      و شَمِّروا ساعد الجِدّ
                      ساعة الجَدّ...

                      هَتَفَ الشَعبُ مِن أعماقُه
                      التَطهير واجِب وَطني..
                      و الحُريَّة في أرض بلادي
                      مِن أحرار بَسمة وطني..
                      حقوقَ المرأة الكانت ضايعة
                      عادت و زانَت رفعَة وَطني..
                      مِن أهداف ثورَتنا
                      حِماية جِيرتنا
                      سلامَة وَحدَتنا
                      هيَّا .. هَيَّا
                      هَيَّا حيُّوا الثورة
                      و شَمِّروا ساعد الجِدّ
                      ساعة الجَدّ...


                      من نخلاتك يا حلفا
                      للغابات ورا تِركاكا
                      من دارفور الحُرَّة نبيلة
                      لِكُلِّ قبيلة على التاكا
                      لِكُلِّ الدم السال يا وطني
                      بنحلف نحنا: فداكا .. فداكا
                      تِحتِك يا رايتنا
                      نَجمَع مِن قُوتنا
                      نَشدُد من عزمتنا
                      هيَّا .. هَيَّا
                      هَيَّا حيُّوا الثورة
                      و شَمِّروا ساعد الجِدّ
                      ساعة الجَدّ...

                      لإفريقيا نمد الأيدي
                      أيدي شباب صَادِق ونبيل
                      ولمَّا ينادي الوطن العربي
                      نَخوض في الموت على كُلِّ دَخيل
                      ونَبقى الآفة الما بتتلافى
                      وكُلَّ الشافها يضوق الويل
                      بإسمِك يا أُمتنا
                      نَصدُق في كَلمتنا
                      و تَظهر بيك عِزَّتنا
                      هيَّا .. هَيَّا
                      هَيَّا حيُّوا الثورة
                      و شَمِّروا ساعد الجِدّ
                      ساعة الجَدّ...

                      تعليق


                      • #26
                        الود
                        عمر الطيب الدوش

                        أعيشهْا معاكَ لو تعْرف
                        دموع البهجَهْ والأفراح
                        أعيشهْا معاكَ واتأسّف
                        على الماضى اللّى ولَّىَ وراح
                        على الفُرْقَهْ الزمان طويل
                        على الصبر الّى عِشْنَاهو
                        مع طُول الألم والليل

                        زمان كُنّا بنَشيل الوُّد
                        ونَدِّى الوُّد
                        وفى عينينا كان يكْبَر حناناً
                        زاد وفات الحدَ
                        زمان ما عِشْنَا فى غُرْبَهْ
                        ولا قاسينا نِتْوحّد
                        وهسَّع
                        رُحْنا نتْوجّع
                        نعيش بالحسرَهْ نتأسّف
                        على الماضى اللِّي ما بِرْجَع
                        أحبَّك
                        لا الزمن حوّلْنى عن حُبّك
                        ولا الحسرَهْ
                        وخوفى عليكَ يمْنَعْنى
                        وطول الإلفَهْ والعُشْرَهْ
                        وشوقى الليك طوَّل
                        لسّه معاي ولى بُكْرَهْ

                        تعليق


                        • #27
                          الطير .. المهاجر
                          صلاح أحمد ابراهيم
                          ***************
                          وحيد فى غربته
                          حيران يكفكف دمعته
                          حزنان يغالب لوعته

                          ويتمنى ... بس لعودته
                          طال بيه الحنين
                          فاض به الشجن
                          واقف يردد من زمن

                          بالله .. بالله
                          يا الطير المهاجر للوطن زمن الخريف
                          تطير بسراع تطير ما تضيع زمن
                          اوعك تقيف وتواصل الليل بالصباح
                          تحت المطر .. وسط الرياح
                          وكان تعب منك جناح .... فى السرعه زيد

                          فى بلادنا ترتاح
                          ضل الدليب
                          اريح سكن

                          فوت بلاد .. وتسيب بلاد
                          وان جيت بلاد
                          وتلقى فيها النيل بيلمع فى الضلام
                          زى سيف مجوهر بالنجوم فى الظلام
                          تنزل هناك وتحى يا طير باحترام

                          وتقول سلام ... وتعيد سلام
                          على نيل بلادنا.... سلام
                          وشباب بلادنا سلام
                          ونخيل بلادنا سلام

                          بالله يا طير
                          قبل ما تشرب .. تمر على بيت صغير
                          من بابه
                          من شباكه بيلمع الف نور
                          تلقى الحبيبه بتشتغل منديل حرير
                          لحبيب بعيد
                          تقيف لديها وتبوس ايديها
                          وانقل اليها وفائي لها
                          وحبى الاكيد

                          وكان تعب منك جناح فى السرعة ... زيد
                          فى بلادنا ترتاح ... ضل الدليب اريح ... سكن

                          تعليق


                          • #28
                            اقابلك
                            الكلمات للشاعر اسحق الحلنقي

                            أقابلك في زمن ماشي
                            وزمن جاي وزمن لسة
                            بشوف الماضي فيك باكر
                            أريت باكر يكون هسة

                            وقصر طول مشاويرنا
                            ورقش بالفرح جلسة على النيل
                            والقمر مرات يبين في الموج ويدسة
                            ونحن نقابلو زي طفلين
                            كلامم كلو بالهمسة
                            وزي عصفورة قلبها دابو حنة
                            وبالولف حسَّ

                            أي عيون بتتقابل إلا عينيكِ ما بتتفات
                            دي عينيك بس و كيف إنتِ
                            حلاة البسمة في القاسيات
                            وعطر الصندل المستني يفرح بيكِ فرحتو جات
                            وحاتك خلي منو شوية شان يرتاحن السمحات

                            بلاك النجمة لا بتتعلى لا بتتدلّى فوقا هلال
                            عليكي الريدة طلي علينا يا الختينا فيكي آمال
                            تجينا فرح ترفرفي فوقنا نستناكي بالموال
                            والشوق بيني بينك انتي زي ماتقول مطر هطّال

                            تعليق


                            • #29
                              راية أكتوبر
                              كلمات محمد المكي ابراهيم

                              إنني أؤمن بالشعبِ
                              حبيبي وأبي..
                              وبأبناءِ بلادي الشُرفاء
                              الذين اقتحموا النارَ
                              فصاروا بيِد الشَعبِ مَشاعِل
                              وبأبناءِ بِلادي البُسطاء
                              الذين انحصدوا في ساحَةِ المَجدِ
                              فَزِدنا عَددا
                              وبأبناءِ بلادي الشُهداء
                              الذين احتقَروا الموتَ
                              فعاشوا أبدا


                              ولأبناءِ بلادي سأُغنِّي
                              للمتاريسِ التي شَيَّدَها الشَعبُ نِضالاً وصُمُودا
                              ولأكتوبرَ مصنوعاً من الدَّم
                              شهيدا فشهيدا
                              ولَهُ لمَّا رفعناهُ أمامَ النارِ
                              دِرعاً ونَشيدا
                              ولَهُ وهو يَهُزُّ الأرضَ من أعماقِها
                              ذكرى و عيدا

                              ولتكن عاليةً خفاقة
                              رايةُ أكتوبرَ فينا
                              ولتَعِش ذِكراهُ في أعماقِنا
                              حُبَّاً وشَوقاً وحَنينا
                              وليَكُن مُنطلَقَ الشَّعبِ
                              بإيمانٍ جديدٍ بالفداء
                              و بإيمانٍ جديدٍ بالوطن...

                              تعليق


                              • #30
                                بلاء و إنجلى
                                كلمات محجوب شريف

                                بلاء و إنجلى
                                حِمدالله ألف على السلامة
                                إنهدّ كَتف المقصَلَة...

                                السِجن ترباسُه إنخَلَع
                                تَحت إنفِجار الزَلزَلة
                                و الشعبِ بِأسرُه إندلَع
                                حَرَّر مَساجينُه و طَلَع
                                قَرَّر ختام المهزلة...

                                يا شارِعاً سوَّا البِدَع
                                أذهَلتَ أسماعَ الملأ
                                كالبَحرِ داوي الجَلجَلة
                                فَتَحت شَبابيكها المُدُن
                                للشَمسِ
                                و إتشابى الخَلا...

                                شُفتَ البنادِق في السماء
                                الضَبط و الرَبط إتنتمى
                                الشَعب شَعب المَلحَمة
                                الصَرخَة كانَت هَمهَمَة
                                و الهَبَّة كانَت مَلمَلة...

                                سَدَّاً مَنيعاً يا وَطن
                                يا شَعب وَهّاج الفِطَن
                                لِلظُلمِ يوماً ما رَكع مَهما جَرى
                                بِئس الذي بيك إجتَرأ
                                تَباً لِعَهدِ السَنسَرة
                                و النَهبِ
                                ثُمَّ السَمسَرة...

                                سَدَّاً مَنيعاً يا وَطَن
                                صَه يا طَنين البَلبَلة
                                أبدَاً لِحُكم الفَردِ .. لا
                                بالدَم لِحُكم الفَردِ .. لا
                                تَحيا الديموقراطية
                                كّم نَفديكَ يا مُستَقبَلها...

                                تعليق

                                يعمل...
                                X